Jıynda oblys ókilderimen birge 11 aıdyń qorytyndysy boıynsha josparlanǵan kórsetkishterge qol jetkizý máseleleri talqylandy.
Aıta keteıik, bıylǵy jyldyń 11 aıynda aýyl sharýashylyǵy ónimderiniń jalpy óniminiń kólemi 3,9 trln teńgeni qurady. Naqty ındeks kólemi ótken jylmen salystyrǵanda 102,3% boldy, jyldyq josparda 102,5%. Qyrkúıek jáne qazan aılarynda sáıkesinshe 1,9 % jáne 2,1%-ǵa artty.
Mınıstrlik ákimdiktermen birlese otyryp, aǵymdaǵy jyldyń basynda ár aýmaq boıynsha aýyl sharýashylyǵy jalpy óniminiń naqty ındeks kólemi esebiniń boljamdy derekterin daıyndady. Sonymen qatar mınıstrlik aı saıyn ákimdikterdiń qatysýymen josparlanǵan kórsetkishterge qol jetkizý boıynsha selektorlyq jıyn ótkizip turady. Sonyń nátıjesinde 11 aıdyń qorytyndysy boıynsha naqty ındeks kóleminiń artýy kútilýde.
Sonymen qatar, jıyn barysynda aýyl sharýashylyǵy jerlerin ártaraptandyrý, osy jyly jınalǵan egindi ótkizý, óńdeýshi zaýyttardy shıkizatpen qamtamasyz etý máseleleri qarastyryldy.
Maıly daqyldar, mal azyǵy daqyldarynan kelip túsetin paıda týraly aıtyldy.
Aýyl sharýashylyǵy kooperatıvterin damytý máselesine keletin bolsaq, 2017 jyldyń 8 jeltoqsanyndaǵy kórsetkish boıynsha respýblıka kóleminde 777 aýyl sharýashylyǵy kooperatıvi tirkelgen nemese 166% jospardan artyq oryndalǵan. Onyń ishinde: 272 AShK-niń sút qabyldaý beketi, 377 AShK-niń mal soıý beketi, 76 AShK-niń jemis-kókónis daıyndaý beketi, 19 AShK-niń qoı soıý jáne jún daıyndaý beketi bar, 3 AShK aralardy ósirý jáne baldy óndirý men qaptaý, 13 AShK qusty ósirý men soıý, 8 AShK qarqyndy baqshalyq, 5 AShK túıe sútin óndirý jáne qaıta óńdeý, 4 AShK taýarly balyq ósirýmen aınalysady, sondaı-aq 114 615 iri qara mal basyna arnalǵan 7 102 otbasylyq bordaqylaý alańy quryldy. 83,2 myń JQSh jáne ShFQ tartyldy.
Kooperatıvter 103,2 myń tonna sút, 16,6 myń tonna et, 28,1 myń tonna jemis-kókónis ónimderi, 162 tonna bal, 31 tonna eshki súti, 45,2 myń dana jumyrtqa óndirdi.
9,3 myń jańa joba qarjylandyrylyp, 8723 jeke kásipker tirkeldi jáne 13,7 myń jumys orny ashyldy.
2018 jyly kooperatıvke tartylǵandar sanyn 200 myńǵa jetkizý, sonymen qatar 115 myń basqa otbasylyq bordaqylaý alańyn qurý josparlanyp otyr. Etti daıyndaýdy 28 myń tonnaǵa, sútti 130,0 myń tonnaǵa jetkizý josparlanýda.
Jıyn barysynda 2018 jylǵy kóktemgi egistik jumystaryna daıyndyq barysy da sóz boldy. 2018 jylǵy kóktemgi egistik jumystaryn nesıeleýge ótinim berý bastaldy.
A.Myrzahmetov jıyn sońynda alǵa qoıǵan mejege jetý úshin oblys ákimderine qaralǵan máselelerde birigip jumys isteýdi kúsheıtý kerek ekenin basa aıtyp, naqty tapsyrmalar berdi.
«Egemen-aqparat»
