Is-shara L.N.Gýmılev atyndaǵy EUÝ-de Eýrazııalyq ıntegrasııa ınstıtýty tarapynan uıymdastyryldy. Monografııalar Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyn iske asyrý turǵysynan jaryqqa shyqqan.
Ǵylymı eńbekter keshendi áleýmettik zertteýlerdiń nátıjeleri jáne elimizdiń ǵalymdary men sarapshylarynyń aýqymdy taldaýlaryna súıene otyryp jasalǵan. Máselen, monografııalarda qazaqstandyqtardyń áleýmettik kóńil kúıi men halyqtyń memlekettik organ qyzmetine seniminiń deńgeıi sekildi birqatar taqyryptar qamtylǵan.
Jıynda sóz sóılegen Eýrazııalyq ıntegrasııa ınstıtýtynyń dırektory Ǵanı Nyǵmetov osy monografııalarda memlekettiń kommýnıkasııalyq jáne áleýmettik saıasatyn qoǵamnyń qabyldaýy turǵysynan muqııat jáne jan-jaqty zertteý jasalǵanyn jetkizdi. Osy eńbektiń nátıjesinde ǵylymı qoldanysqa «ıntegrasııalyq-kommýnıkasııalyq saıasat» atty termın engizilip, ony tıimdi iske asyrý praktıkasy kórsetildi. Ǵ.Nyǵmetovtiń aıtýynsha, zertteý nátıjelerine súıenip naqty usynymdar ázirleý barysynda ashyq talqylaý alańdary qoldanylǵan.
Is-sharaǵa ǵylymı-sarapshylyq qaýymdastyqtardyń ókilderi, monografııa avtorlary men resenzentteri qatysty. Monografııalarda tyń derekter, tujyrymdamalyq máseleler qamtylǵany, eńbekterdiń ǵylym men bilim berýdegi mańyzy joǵary ekeni atap ótildi. Jınalǵandardyń aıtýynsha, júrgizilgen zertteýler Elbasy usynǵan aýqymdy ózgeristerdi qazaqstandyqtardyń keńinen qoldap otyrǵanyn aıǵaqtaıdy. Sonymen qatar usynylǵan materıaldardyń zań shyǵarý prosesin jetildirýge de úles qosatyny aıtyldy. Monografııalardy aldaǵy ýaqytta 50-ge jýyq joǵary oqý oryndarynyń áleýmettik-gýmanıtarlyq kafedralary men Qazaqstan halqy Assambleıasynyń kafedralarynda oqý-ádistemelik qural retinde qoldaný josparda bar.
Sharada ujymdyq monografııalardyń birlesken avtorlary men resenzentteri sóz sóılep, qoǵamdyq sananyń qundylyq negizderin saqtaýǵa qazaqstandyqtardyń tartylý deńgeıin júıeli túrde ólsheý formatyn jalǵastyra berý qajet ekenin atap ótti.
Abaı ASANKELDIULY,
«Egemen Qazaqstan»
