– Biz bul kelisimshartty debıýttik dep otyrmyz, sebebi teńgege denomınasııalanǵan eýrooblıgasııalardy shyǵarý bank úshin shyn máninde tyrnaqaldy qadam bolyp otyr,– dedi Bolat Jámishev.
Onyń aıtýynsha, qundy qaǵazdardyń aınalymda bolý merzimi 3 jyldy quraıdy. О́teý merzimi 2020 jyldyń 14 qyrkúıegine belgilengen. Onyń esep aıyrysý mámilesi aǵymdaǵy jyldyń 14 jeltoqsanynda júrgizilmek. О́telýine qaraı kiristiligi 9,625 paıyzdy quraıdy.
– Úsh jyldyq oblıgasııalar boıynsha 9,625 paıyzdyq mólsherleme bizdiń óz elimizdegi múmkindikten tómen,– dedi «Qazaqstan damý banki» AQ basqarma tóraǵasy.
Bank usynyp otyrǵan bondtardy ornalastyrý geografııasy birneshe memleketti qamtıdy. Atap aıtqanda, Ulybrıtanııada shyǵarylym kólemi 63 paıyzdy, AQSh-taǵy úles 21 paıyzdy, Germanııada 8 paıyzdy, basqa da Eýropa elderindegi shyǵarylym kólemi 6 paıyzdy quraıdy.
Bolat Jámishev aıtyp ótkendeı, ınvestorlardyń qatary birshama keń. Basym bóligi ınvestısııalyq aktıvterdi basqaratyn 29 ınvestor bar. Baǵaly qaǵazdardyń emıssııa kóleminiń 97 paıyzyn aktıvterdi basqarý qorlary, 2 paıyzyn hedj-qorlar, 1 paıyzyn bankter alatyn bolady.
«Báıterek» holdınginiń enshilesi «QBD» el ekonomıkasynyń shıkizat emes jáne ınfraqurylym sektoryn jańǵyrtý men damytý jumystarymen aınalysatynyn aıta keteıik. Aksıonerlik qoǵam ekonomıkaǵa ishki jáne syrtqy ınvestısııa tartý, óndiristik ınfraqurylym men óńdeý ónerkásibin damytý syndy baǵyttarǵa basymdyq beredi.
Arnur ASQAR,
«Egemen Qazaqstan»
