Oblys ortalyǵynyń batys shalǵaıy sońǵy az ǵana jylda qarqyndy damyǵan bolatyn. Osydan onshaqty jyl buryn Qostanaı qalasynyń osy betine shyǵa kelseń kósilip jatqan dala aldyńnan shyǵatyn edi. Mine, qazir onda mashına qurastyratyn bir emes eki zaýyt – «AgromashHoldıng» pen «SaryarqaAvtoProm» tur. Totydaı qulpyryp, «Arman» shaǵyn aýdany, áleýmettik nysandar boı kóterdi. Endi qos zaýyttan sál ári qatarlasa aýmaǵy 400 gektar bolatyn «Qostanaı» ındýstrııalyq aımaǵy ornalasty. Onyń qurylýy úsh kezeńnen turady. Alǵashqy kezeńinde aımaqqa onyń ákimshilik-turmystyq kesheni salynyp, paıdalanýǵa berildi. Onda jalǵa alýshylar úshin 10 kabınet, 40 oryndyq ashana, 11 oryndyq qonaq bólme, 90 oryndyq májilis zaly ornalasqan. Aldaǵy ýaqytta munda ınvestorlarǵa ońaı bolýy úshin bank konsýltanttary, notarıýs, kásipkerlerge qajetti basqa qyzmet túrleriniń ókilderi otyratyn bolady. Indýstrııalyq aımaqqa bıyl gaz, baılanys, elektr jelisin tartý sekildi ınfraqurylym jumystary 2,5 mıllıard teńgeni qurady.
Munda óńir ekonomıkasyna ınvestısııa salatyn óndiris kásiporyndary ornalasatyn bolady. Bıyl qyrkúıek aıynda kórshi Reseıdiń Ekaterınbýrg qalasyndaǵy VEK kompanııalar toby men qostanaılyq «Tobyl» ÁKK» AQ birlesip qurǵan «VEK Qazaqstan» lıft qurastyratyn zaýyty «Qostanaı» ındýstrııalyq aımaǵynan oryn tepken alǵashqy qarlyǵash boldy. Qazir aımaqta onyń ámbebap-qurastyrý sehynyń qurylysy júrip jatyr. «Tobyl» ÁKK» AQ basqarma tóraǵasy Qanat Nurshınniń aıtýynsha, kelesi jyly sáýir-mamyr aılarynda sehtyń qurylysy aıaqtalady, mamyr aıynda Ekaterınbýrgten lıft qurastyratyn jabdyqtar ákelinedi. Maýsym aıynda alǵashqy ónim de daıyn bolýy tıis.
Bizdi Qostanaı jaǵynyń ınvestorlarǵa jaǵdaı jasaýy qyzyqtyrdy. Oblys ákimdigi barlyq máselelerdi jedel sheship berdi, deıdi VEK kompanııasynyń bas dırektory Mıhaıl Molochnıkov. Reseılik ınvestordyń aıtýynsha, 600 kılodan asa júk kóteretin lıftiler jasaýǵa qazaqstandyq metall paıdalanylady. Zaýyttyń alǵashqy kezeńinde 45 jumys orny ashylady. Jumystyń qazaqstandyq úlesi 60 paıyzǵa deıin jetkiziledi. О́ndiriske qazaqstandyq metaldyń, arzan jumys kúshiniń paıdalanýy jáne salyq jeńildigi lıfti baǵasynyń Reseıdegi balamasyna qaraǵanda, biraz arzan bolýyna yqpal etedi. О́ndirilgen ónimdi ótkizýde de eki jaq múddeli bolady. Qostanaı jaǵynyń júrgizgen jumysy arqasynda áli qurylysy júrip jatqan zaýyttyń ónimine suranys jasap qoıǵandar da bar. Zaýyt lıftimen tek Qazaqstandy ǵana qamtamasyz etip qoımaıdy, aldaǵy ýaqytta eksportqa shyǵarýdy da josparlap otyr.
Oblys ákimi Arhımed Muhambetov lıfti qurastyrý zaýytynyń qurylys barysyn qaraǵannan keıin ındýstrııalyq aımaqtyń áleýmettik-turmystyq keshenindegi májilis zalynda ınvestorlar tartý jóninde keńes ótkizdi.
– Aldaǵy eki jylda ındýstrııalyq aımaqqa keminde 10 ónerkásip kásiporny ornalasady. Biz bul jerge qurylys óndirisi, avtobólshekter shyǵaratyn, azyq-túlik óndiretin kásiporyndar keledi dep josparlap otyrmyz. Ol úshin munda barlyq ınfraqurylymdyq jaǵdaı jasalady, – dedi oblys basshysy. Qazirdiń ózinde jergilikti «Astyq» elevator zaýyty» JShS, ydys jáne oraý zattaryn óndiretin almatylyq «Qostanaı Pak» kompanııasy, iri júk mashınalaryna jabdyqtar júıesin óndiretin reseılik «Glob Gaz Grýpp» kompanııalar toby ındýstrııalyq aımaqtan oryn alý úshin kelissózder júrgizýdi bastady. Onyń syrtynda májiliste Reseıden kelgen burǵylaý quraldaryn óndirýmen aınalysatyn jáne ózindik tehnologııasymen sý jáne kanalızasııa qubyrlaryn qalpyna keltiretin eki ınvestor usynystaryn aıtty.
Aldaǵy jyly Qostanaı oblysy tarapynan ındýstrııalyq aımaqqa ınfraqurylym jumystaryn júrgizý jalǵasyn tabatyn bolady. Munda áli de 4,5 shaqyrym tas jol tóseledi, temir jol tuıyǵy tartylady. Sonyń barlyǵyna respýblıkalyq bıýdjetten 2,6 mıllıard teńge qarastyrylyp otyr. Indýstrııalyq jańa aımaqtyń bolashaqta tek Qostanaı oblysy ekonomıkasyn órge súırep qoımaı, elimiz ekonomıkasynyń odan ári damýyna yqpaly bolady degen senim bar.
Názıra JÁRIMBET,
«Egemen Qazaqstan»
QOSTANAI
