«Aqyldy karer» jobasy tıimdilik kórsetkishterdiń tolyq aıqyndylyǵyn jáne baqylaýdy qamtamasyz etedi. Bul kásiporynnyń shyǵarǵan ónimine, jalpy óndiris ekonomıkasyna oń áser beredi. Jańalyq Indýstrııa 4.0 elementteriniń birnesheýin engizý arqyly konsentrat óndirýdiń tolyqtaı biriktirilgen sıklyn bildiredi.
Joba elementteriniń biri GIS jáne ERP júıesimen biriktirilgen avtomattandyrylǵan Modular júıesin engizýmen baılanysty. Ol óndiristik úderisterdi úlgileý degendi bildiredi. Karerdegi jaǵdaılardyń jedel monıtorıngin, qajetti túzetýler engizýdi jáne kenish kólik jabdyqtaryn ońtaıly bólýdi operator emes, kompıýterler júzege asyrady. Maman tek «Aqyldy karerdiń» úzdiksiz jumys isteýin baqylaıdy. Nátıjesinde shuǵyl esepke alýdy jáne ınvestısııalyq sheshimderdi qabyldaýdy qoldaý úshin jabdyqty paıdalaný týraly 100 paıyz anyq jáne tolyq aqparat alynady.
Osynyń barlyǵy óndiristegi qatelikter men jańylýlardy azaıtady, tehnıkanyń jospardan tys turyp qalýyn boldyrmaıdy, onyń qozǵalý jáne taratý jyldamdyǵyn arttyrady, shyǵyndardy ońtaılandyrady. Eń bastysy, jabdyqtyń ónimdiligin 10 paıyzǵa arttyrady.
– Bul óndiris shyǵyndaryn barynsha azaıtyp, mıllıard teńgeden astam qarjy únemdeýdi qamtamasyz etetin óte joǵary kórsetkish,– dep atap ótti SSKО́B prezıdenti Bereke Muhametqalıev. – Búgingi tańda eń zamanaýı tehnologııalardy qoldana otyryp, tehnıkamen qaıta jaraqtandyrý ekonomıkalyq tıimdi jobalardy júzege asyrýǵa jáne elimizdiń ken-metallýrgııa kesheniniń básekelestik ustanymdaryn nyǵaıtýǵa kómektesedi. Sondyqtan da Indýstrııa 4.0 elementteri ken óndirý ónerkásibine molynan engiziletin bolady.
Bul tehnologııany Eýrazııalyq Top óziniń barlyq óndirýshi kásiporyndarynda engizetin bolady.
Názıra JÁRIMBET,
«Egemen Qazaqstan»
Qostanaı oblysy,
Rýdnyı qalasy
