Sýretterdi túsirgen: Aıbatyr NURASh
Áýeli «Týǵan ólkem – tiregim» atty jastar forýmy TEDTalks formatynda ótti. Nazarbaev zııatkerlik mektebindegi kezdesýde Parlament Senatynyń Áleýmettik-mádenı damý jáne ǵylym komıtetiniń tóraıymy Birǵanym Áıtimova, saıasattanýshy Saıasat Nurbek, «Qazaqstan-2050» qozǵalysynyń jetekshisi, kásipker Muxtar Mankeev spıker sanatynda sóz aldy. Kópshilik jastar Batys Qazaqstan oblysynyń ákimi Altaı Kólginovtiń kitap oqýdyń paıdasy týraly áńgimesine yqylaspen qulaq túrip, qol soqty.
Forýmnyń maqsaty – týǵan ólkege degen súıispenshilik arqyly Elbasynyń «Rýxanı jańǵyrý» baǵdarlamalyq maqalasynda belgilengen negizgi maqsattardy júzege asyrýǵa jańa serpilis berý, ǵylym-bilim, óner, densaýlyq saqtaý, sport jáne azamattyq bastamalardy kúsheıtýge yqpal jasaý, deıdi sharany uıymdastyrýshylar.
Bul kúngi sharalarǵa álemge áıgili alpınıst, dúnıe júzindegi barlyq «segizmyńdyq» shyńdy ottegi balonynsyz baǵyndyrǵan Maqsut Jumaev, álemge áıgili skrıpkashy Marat Bısenǵalıev, senator Narıman Tóreǵalıev, tanymal óner qaıratkeri, «Ázil álemi» ázil-syqaq teatrynyń dırektory Tursynbek Qabatov, «Azamattyq bastamalar zertteý ortalyǵy» KEAQ basqarma tóraǵasy Nurlan О́teshev arnaıy shaqyrylǵan. Meımandar «Rýxanı jańǵyrý» baǵdarlamasynyń 4 negizgi kishi baǵdarlamalary – «Tárbıe jáne bilim», «Atameken», «Rýxanı qazyna» jáne «Aqparat tolqyny» boıynsha semınar-trenıngter ótkizdi. Bul sharalarǵa «100 jańa tulǵa» jobasyna esimderi engen batysqazaqstandyq pıanıst Saıda Qalyqova, QazIITÝ ǵylymı-bilim kesheniniń quryltaıshysy Aqserik Áıtimov, Zelenov aýdandyq aýrýhanasynyń medbıkesi Elena Shýshlebına da qatysty.
Shartaraptan jınalǵan jerlester basqosýynyń qorytyndysy – «Jomart júrek-2017» mesenattar forýmy boldy. Forým aldynda Oral qalasy men aýdan ákimderi Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» baǵdarlamasy aýqymynda 2018 jylǵa josparlanǵan jobalardy tanystyrdy. Batys Qazaqstan oblysynda búginde 1230-ǵa jýyq mesenat bar eken. Olar bıyl 851 qaıyrymdylyq sharasyna qoldaý kórsetken.
– «Týǵan jer» baǵdarlamasy aıasynda 600-den astam joba usynyldy. Kórmege sonyń 260-tan astamyn iriktedik. Jyl sońyna deıin usynylatyn jobalar sany kóbeıedi dep otyrmyz. «Rýhanı jańǵyrý» baǵdarlamasy boıynsha «Jomart júrek-2017» mesenttar forýmy Oral qalasynda birinshi ret uıymdastyrylyp otyr. Týǵan jerin abattandyrýǵa kez kelgen azamat úles qosa alady. Olardyń qarajaty «Aqjaıyq» qoryna jınalady, – dedi kórme kezinde oblystyq «Rýhanı jańǵyrý» jobalyq keńsesiniń jetekshisi Saltanat Tumanbaeva.
– Árbir Qazaqstan azamaty úshin týǵan jeriniń kósegesin kógertýge atsalysý – paryz. Halqymyzda «Jaqsynyń jaqsylyǵyn aıt, nury tasysyn» degen sóz bar. Osy ıgi isti asyrýda búgin batysqazaqstandyqtar da shet qalmady, – dedi óz sózinde óńir basshysy Altaı Kólginov.
Oblys ákimi 178 mln teńge qarjyǵa óz aýylyna dene shynyqtyrý-sport keshenin salyp bergen Aleksandr Aıtovty, ózi týǵan Saryqudyq aýylyna feldsherlik-akýsherlik pýnkt salyp, búkil qural-jabdyǵymen qamtamasyz etken qaztalovtyq Nurlybaı Joldybaevty, jaqyn kúnderi Oral qalasynda ashylatyn «Rýhanı jańǵyrý» mýzeıin jóndeýge kómektesken kásipker Muratbek Muhambedıevti úlgi etip aıtyp ótti.
«Rýhanı jańǵyrý» baǵdarlamasy qolǵa alynǵaly Batys Qazaqstan oblysynda 62 joba júzege asypty. Onyń 7-ýi – bilim salasynda, 1 joba – densaýlyq saqtaý salasynda, 10-y – ınfraqurylymdy jaqsartý, 9-y – sport salasynda atqarylǵan. Osy baǵdarlama aıasynda 2 mádenıet úıi jóndelip, 16 eskertkish ornatylǵan.
Batys Qazaqstan oblysynyń ákimi A.Kólginov aldaǵy jyly atqarylatyn sharalar týraly da aıtyp ótti.
– Biz úsh úlken jobany qolǵa alǵaly otyrmyz. Onyń biri – Qazaqstannyń 100 kıeli nysany qataryna engen ortaǵasyrlyq Jaıyq qalasynyń ornynda ashyq aspan astyndaǵy mýzeı ashý. Ekinshisi – Astanadaǵy «Atameken» etno-memorıaldy kesheniniń úlgisimen Oral qalasynda Qazaqstannyń 100 kıeli nysanynyń shaǵyn beınesinen «qasıetti Qazaqstan» kartasyn jasaý. Al úshinshi joba – sal aýrýyna shaldyqqan balalardyń kúndiz ýaqyt ótkizip, emdelýine arnalǵan áleýmettik úı ashý. Bul jobalardyń barlyǵy da bıýdjet qarjysyn paıdalanbaı, demeýshilerdiń qoldaýymen atqarylady. Jalpy, 2018 jyly bizdiń oblysta mesenattardyń kómegimen 1 mlrd 500 mln teńgeniń jumysy atqarylady dep otyrmyz, – dedi Altaı Kólginov.
Forýmda bir top mesenat «Jomart júrek-2017» atalymymen jáne oblys ákiminiń Alǵys hatymen marapattaldy. Olardyń arasynda iri kásiporyndar men qurylys kombınattarynyń basshylary, jeke kásipkerler men jergilikti máslıhat depýtattary bar.
Qazbek QUTTYMURATULY,
«Egemen Qazaqstan»
ORAL
