Atalmysh mektep óz bastaýyn sonaý dinı saýat ashý mektepterinen alǵan eken. Buqaradan oqý bitirgen Nurnııaz ahýnnyń tálimin jalǵastyrǵan shákirtterdiń kıiz úıdegi mektepteri 30-shy jyldardyń bas kezinde eki bólmeli mektepke, keıin kolhozdyń tórt jyldyq mektebine aınalǵan. Oqý ordasynyń búgingi basshysy óz mektebiniń ótkenimen, tarıhymen mereılenetini baıqalyp tur, birden mektepti aralatyp, onyń keshegisi men búgini týraly uzaq baıandap berdi. Ábish Kekilbaı oqyǵan aýyldyń búgingi mektebiniń basshysy maqtansa oryndy bolar...
1954-55 jyldary Ushtaǵanda salynǵan, Lenın atyn ıemdengen alǵashqy mektep arada 20 jyldan astam ýaqyt ótkende jańaryp, aýyl turǵyndary eki qabatty mektepke ıe bolǵan. Alaıda taǵy 20 jyl ótkende bul mektep sýǵa ketip, jaramsyz bolyp qalady da, 2006 jyly jańa mektep ǵımaraty boı kóteredi. Mektebi sýǵa ketip, jańa mektep qurylysyna úlken úmit etken ushtaǵandyqtar eski ataýdy sýǵa ketken mekteppen birge tastap, jańa mektepke Ushtaǵan atyn suraıdy. Bul tilek oryndalǵanymen, keıin mektepke jyldyń jeltoqsan aıynda Lenın, «Eńbek Qyzyl Tý», «Qyzyl Juldyz» ordenderiniń ıegeri, oblystyq partııa komıtetiniń pleným múshesi bolǵan halyq qalaýlysy, óz aýylynyń «Altynsarıni» bolyp, aýyl balalaryn oqytýǵa kúsh salǵan, óz qarajaty esebinen qarjylandyryp, qıyn kezde aýyl turǵyndaryn, oqýshylardy as-sýmen, kúsh-kólikpen qamtyp, biraz balalardy mektepke jáne birqataryn Atyraýǵa oqytyp, aýylǵa maman daıyndap bergen, elge qamqor atymtaı azamat Asqar О́tepbergenov esimi berildi.
Mekteptiń búgingi beınesi de jaman emes. 313 balaǵa laıyqtalyp salynǵan ǵımaratta 400-ge tarta bala oqyp, 60-qa jýyq ustaz sabaq beredi eken.
– Oqýshylarymyz da, ustazdarymyz da túrli deńgeıdegi bilim baıqaýlaryna qatysyp, júldeli oryndarǵa qol jetkizip keledi. Mekteptiń ishindegi oqý-tárbıe jumysynyń eń basty kórsetkishiniń biri osy. Biz júırikterimizge, grant ıegerlerine, joǵary oqý oryndaryna túsken túlekterimizge qarap, óz jumysymyzdyń nátıjesin kóremiz jáne soǵan qýanamyz, – deıdi mektep basshysy Qosnııaz Ánýarbekuly.
Mektepte ár jyldary eńbek etken ulaǵatty ustazdardyń esimin este qaldyrý maqsatynda ár pán kabınetine ustazdardyń esimin berip, tórine sýreti men ómirbaıanyn ilip qoıýy áserli. Bıologııa kabıneti Q.Muqajanovtyń, hımııa kabıneti Sh.Dosatovtyń, geografııa kabıneti T.Nııazmaǵanbetovtiń atyna berilse, fızıka kabıneti B.Súıesinovtiń, matematıka kabıneti S.Ánesovtiń atymen atalady eken. Olardyń barlyǵy da mektepte osy pánder boıynsha sabaq berip, aldynan talaı túlekti túletken aýyl ustazdary.
Aýlasyna aǵash otyrǵyzylǵan mekteptiń shaǵyn jylyjaıynda birneshe ósimdik túrleri ósirilip, qoıan, qustar ákelingen. Qum basý qaýpi týyndaǵandyqtan, sekseýil, baıalysh syndy butaly ósimdikterdi ósirý arqyly qum toqtatý isi júrgizilgen Ushtaǵanda mekteptiń jasyldandyrýdan tys qalmaǵany baıqalady.
Mekteptiń taǵy bir tartymdy tusy – búkil aýyl tarıhyn qamtıtyn murajaıynyń bolýy. Mektep murajaıynyń tabaldyryǵynan attaǵanymda bólmege emes, aýyl tarıhy jazylǵan alyp kitaptyń ishine engendeı bolǵanymdy jasyrmaımyn. Aýyldyń aıtýly azamattary, ár jyldardaǵy mektep dırektorlary, soǵysqa ketkender, oralǵandar men oralmaǵandar, aýyl moldalary, jazyqsyz jala jabylǵan bozdaqtar, zerger-ustalar, ańshylar, aýyl dárigerleri, batyr analar, eńbek ozattary, aýyldyń alǵashqy júrgizýshileri men mehanızatorlary, ár jyldardaǵy ákimder, Ushtaǵan mektebin bitirgen túlekterdi túgendegen albomdar, aýyl aýmaǵyndaǵy kıeli oryndar, tarıhı-mádenı eskertkishter – aýylǵa qatysty barlyǵy málimet murajaıǵa jınaqtalǵan. Qyzyǵýshylyq tanytqan janǵa aýyl týraly túsirilgen derekti fılmdi kórsetýge kompıýter men arnaıy taqta da daıyn tur.
– Jylý bar, balalar ystyq tamaqpen qamtylǵan. Mekteptiń sport zaly bar, burynǵy mekteptiń sport zalyn da qosymsha jarystar, úıirmeler úshin paıdalanyp otyrmyz, kemshin soǵyp jatqan másele joq, – dedi ol.
Bardy uqsatyp, jumysty úılestirýimen úlgi ushtaǵandyq mektep zamanaýı jabdyqtarmen qamtylsa, bilim berý isinde óz áriptesterimen básekede ozyq oryndardan tabylaryna senimdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy,
Mańǵystaý aýdany
