Jamanat habardy telefon qońyraýlatqan kórshilerinen estip, esinen tanyp, qulap qala jazdaǵan. Jańylys bolar, tańerteń ǵana sap-saý tur edi ǵoı dep ózin-ózi qansha jubatqanmen bir ornynda baıyz taýyp otyra almaǵan. Tyǵyz sharýalardan qoly bosamaǵan apasy Gaýhar Ahmetjanovamen habarlasyp, máseleniń anyq-qanyǵyn bilýdi ótingen. Ol entige basyp jetkenimen, súrilip tastalǵan baspanyń jurtyn ǵana keziktiredi. Júgire basyp, qalalyq ákimdikke keledi. Ondaǵylar bul oqıǵaǵa bizdiń esh qatysymyz joq dep at-tondaryn ala qashady. Úılerdi qulatýǵa jaýapty mekeme men adamdardyń telefon nómirin alǵanymen, eshkim telefon kótermeıdi.
Jergilikti bılik oryndarynyń jaýapsyzdyǵy saldarynan turyp jatqan úıden aırylyp, dalada qalǵan Dına qystyń kózi qyraýda týǵan-týystaryn saǵalap júr. «Jas órken» shaǵyn aýdanynda ornalasqan úıimniń buzylatynyn biletinmin. Biraq ol týraly aldyn ala eskertilmegeni tańdandyryp otyr. Baspana ishindegi jıhazdardyń, turmystyq zattardyń qaıda ketkeni, jańa páterdiń qashan beriletini belgisiz. Ne isterimdi bilmeı dalmyn», deıdi 20 jastaǵy boıjetken jylamsyrap.
Qalalyq ákimdiktegiler bolsa oryn alǵan orynsyz oqıǵany jýyp-shaıyp, barlyq jaǵdaıdy jasaýǵa, atap aıtqanda múlikterdi qalpyna keltirýge, shyǵyndardy óteýge, sondaı-aq páter alýǵa kepildik beretin qujattardy resimdeýge ýáde berip otyr.
О́mir ESQALI,
«Egemen Qazaqstan»
PETROPAVL
