Qoǵamdyq ómirde sógis ózge de árqıly jaǵdaılarda jarııalanady. Aqtóbe oblysy ákiminiń baspasóz qyzmeti laýazymdy tulǵaǵa daǵdyly tájirıbeden tys berilgen erekshe bir sógis jóninde jergilikti basylymdar arqyly aqparat taratty.
Aqtóbe oblysynyń kadrlyq komıssııasynyń sheshimi boıynsha aıyryqsha tártiptik jaza Qarǵaly aýdanynyń ákimi Rahat Sydyqovqa berilgen. Ne úshin? Aıdyń, kúnniń amanynda ne búldirip qoıdy eken? Atqaryp júrgen qyzmetinde bir shıkilik bolǵany-aý shamasy. Joq, munyń biri de emes, gáp basqada bolyp shyqty. Ol Aqtóbe oblysynyń ákimi Berdibek Saparbaevtyń Qarǵaly aýdanyna sapary kezinde ústirt áreketke jol bergen. Naqtyraq aıtqanda, R.Sydyqov oblys basshysynyń atalǵan aýdanǵa qarasty Badamsha aýyly turǵyndarymen basqosýǵa tek jergilikti memlekettik qyzmetshiler men shaǵyn jáne orta bıznes ókilderin ǵana shaqyrǵan. Sógisti sol úshin arqalapty.
Buǵan ne deýge bolady? Árıne tek bir ǵana Qarǵaly aýdanynyń ákimi tarapynan kezdesken kemshilik desek, shyndyqtan alshaqtaý ketip qalarmyz. О́zge óńirlerde de osyǵan uqsas kórinister kezdesip qalyp júrgeni jasyryn emes. Mundaı syńarjaq ustanym jergilikti atqarýshy organdar jetekshileriniń abyroıyna daq túsirýi múmkin ekenin de joqqa shyǵara almasaq kerek. Ekinshiden, laýazymdy tulǵa men betpe-bet pikir alysýǵa tek «shtattaǵy sheshender» men memlekettik qyzmetshilerdiń shaqyrylýy el-jurttyń arasynda túrli alyp-qashpa pikirler týǵyzýy da ǵajap emes.
Áńgimeniń ashyǵyna keleıikshi. Respýblıkadaǵy oblys ákimderi úlken laýazymdy tulǵa emes pe? Oblys ortalyǵynan shalǵaı ornalasqan jergilikti eldi mekenderde turatyn qarapaıym halyqtyń óńir basshysynyń qabyldaýyna kirýine múmkindigi bola bermeıtini belgili. Olardyń bárin qabyldaýǵa oblys ákimderiniń jumys kestesi sáıkes bolmaıtyny taǵy da túsinikti. Sonda jergilikti turǵyndar kókeıde júrgen oılary men tilekterin osyndaı kezdesýlerde aıtpaǵanda qaıda aıtady?! Áıtse de keıbir jaǵdaılarda jurtshylyq ókilderi oǵan shaqyrylmaı qalady. Turǵyndar men bılik ókilderi arasynda tikeleı únqatysýlar bolǵan jaǵdaıda ózara túsinistik odan ári tereńdeı túspeı me? Qarǵaly aýdany ákimine óńirlik kadrlyq komıssııanyń sheshimimen sógis jarııalanǵan kezde osyndaı oılar kelip edi kókeıge. Bul jaıttardan onyń áriptesteri tıisti sabaq alsa ıgi.
Temir QUSAIYN,
«Egemen Qazaqstan»
AQTО́BE
