Memleket basshysy usynǵan «Rýhanı jańǵyrý» baǵdarlamasy talaptarymen meılinshe úndes bolmystaǵy aıtys alamanynda eldiń ár aımaǵynan jáne Qytaı Halyq Respýblıkasynan saıdyń tasyndaı iriktelip kelgen, «sen tur, men ataıyn» deıtindeı súbeli sózdiń maıyn tamyzǵan 14 jas aqyn báseke kórigin qyzdyrdy.
Jyr dodasynyń ashylý rásiminde aıtys aqyndary men kórermen qaýymdy qala ákimi, «Nur Otan» partııasy qalalyq fılıalynyń tóraǵasy Asqar Ydyrysov, qoǵam qaıratkeri Álıhan Báımenov, aıtysqa tórelik etýshi qazylar alqasynyń tóraǵasy, belgili jyr júırigi Amanjol Áltaev quttyqtap, sóz sóıledi. Osy oraıda, qazylar alqasynyń quramynda elge etene tanys aıtys aqyndary Tólegen Jamanov pen О́mirjan Kópbosynov, kenshi-aqyn, Qazaqstan Jazýshylar odaǵynyń múshesi Musa Tileýov, aqyn-jýrnalıster Abdolla Dastanov pen Iztóleý Túsipov bolǵanyn aıta ketken jón.
Eki kúnge ulasqan jyr dodasynda jas aqyndar Shynbolattyń izimen shyndyqty shyraıyn engize otyryp shyrqady. Aıtys barysynda Shynkeńniń ulttyq óner túrlerin órkendetýge qatysty ólsheýsiz eńbegi men dara tulǵa retindegi qadiri men qasıeti de ádemi áspetteldi. Bir sózben túıindesek, ár aqynnyń ózine tán tanym-túısiginen týyndaǵan oralymdy oılar men marjan sózder tyńdarmannyń qulaq quryshyn qandyrdy. Jandaryn jadyratyp, birshama qaýymnyń sanasyna sáýle quıdy. Nátıjesinde Shynbolat Dildebaevtyń áýleti taǵaıyndaǵan arnaıy júldelerdi tarazdyq Raı Dóńbaı, ulytaýlyq Muqaǵalı Seıtqazy, jańaarqalyq Medet Nurlanuly jáne Sátbaev qalasynyń namysyn qorǵaǵan Jeńis Tilekenov ıelendi. III orynǵa tıesili árqaısysy 100 myń teńge kólemindegi eki júldeni jezqazǵandyq Jolaman Maǵzumov pen pavlodarlyq Nurqanat Qaırat ózara bólisti. Taraz qalasynan kelip, tyńdarmandy támsil tunǵan tamasha jyrymen tamsandyrǵan arý aqyn Arýna Kerimbek II oryndy enshilep, 300 myń teńge syıaqyny aldy. I orynǵa laıyqty túrde qol jetkizgen qytaılyq qandas qaryndasymyz Sulýjan Taýbaldynyń sulý óleńderi men qazaq qyzyna tán ıbaly minezine, taýyp aıtar jáne tóńiregin túgendep aıtar tapqyrlyǵyna tánti bolǵan kórermen oǵan somasy 400 myń teńge quraıtyn júlde tapsyrylar sátte ystyq yqylasyn tanytýdan aıanyp qalmady. Al, Bas júldeni (600 myń teńge) jeńip alǵan aqtóbelik dúldúl aqyn Danııar Aldabergenovtiń sańlaq sózderine aıtysqumar qaýym eki kún boıy meıirlene qol soqqany anyq edi. Budan bólek, uıymdastyrýshylar tarapynan júldege ilikpegen aqyndarǵa 40 myń teńgeden syıaqylar berildi.
Qaladaǵy ulttyq óner ortalyǵynyń jetekshisi Gúlsim Dáýit sahnada jasyndaı jarqyldaǵan Sulýjan Taýbaldyǵa kórermen yqylasynyń aıǵaǵy retinde qoldan quıylǵan kúmis júzik tartý etti.
Aıtystan keıingi aýyzeki talqylaýlar kezinde jurtshylyq qazylar alqasynyń ádildik jalaýyn jyqpaı, aqyndarǵa qapysyz baǵa bergenin aıtyp jatty. Shyntýaıtynda, sońǵy sheshim kıeli óner saıysyna tórelik jasaýdyń tóresindeı boldy.
Aıtysty qorytyndylaý sátindegi óz lebizinde qala ákimi Asqar Ydyrysov jyr júırikteri dodasynyń jyl saıyn dástúrli negizde ótkizilip turatynyn málimdedi.
Mıras ASAN,
«Egemen Qazaqstan»
Qaraǵandy oblysy,
Sátbaev qalasy
