Múgedekter múddesi eskerilse ıgi

Qoǵam nazaryn aıryqsha qajet etetin azamattar jóninde aıtylsa, múm­kin­digi shekteýli jandar aldymen oıǵa ora­la­tyny ras. Búginde Qazaqstanda mundaı azamattardyń sany 563 myńnan asyp jy­ǵy­lyp otyr. Al sol qamkóńil jan­darǵa mú­sirkeı qaraǵannan góri, olardyń qo­ǵam­daǵy belsendiligin meılinshe arttyrý mem­leketti mazalaıtyn mańyzdy máse­le­niń qatarynda bolýy tıis. Parlament Se­naty depýtattarynyń memlekettik organdar men úkimettik emes uıymdar ókil­de­rimen kezdesýinde talqylanǵan máseleniń tórkini osyǵan saıdy. Parlamenttiń joǵary palatasynyń Áleýmettik-mádenı damý komıtetiniń tikeleı uıytqy bolýymen uıymdas­ty­ryl­ǵan is-shara aıasynda «Qazaqstan Respýb­lı­kasyndaǵy múgedekterdi áleýmettik qor­ǵaý týraly» Zańdy jáne Qazaq­stan­daǵy múmkindigi shekteýli jandardyń ómir sapasyn arttyrý men quqyǵyn qam­tama­syz etý jónindegi ulttyq jospar joba­syn júzege asyrý barysy qaraldy. Áleýmettik-mádenı damý komıtetiniń tóraǵasy Ahan Bıjanov jıyndy asha kele, múgedekterdiń qoǵamdyq ómirge ara­lasýyna jaǵdaı jasap, teń múmkindik berýdiń, áleýmettik qoldaý men olardy kásibı turǵyda qaıta beıimdeýdiń ózindik júıesin qalyptastyrýdyń mańyzdyly­ǵy­na toqtaldy. Senator elimizdegi 563 myń­nan astam múmkindigi shekteýli jandar el turǵyndarynyń jalpy sanynyń 3 paıyzdaıyn qurap otyrǵanyn aıta kele, bul jandarǵa áleýmettik turǵyda qoldaý kórsetý úshin normatıvtik-quqyqtyq ba­za­nyń negizi qalanǵanyn, bul zańnama turǵyndardyń eńbekke qabilettiliginen aıyrylý qaýpin aldyn alýǵa, múmkindigi shekteýli janǵa aınalǵandardy qoldaý men qorǵaýdy qamtamasyz etýge baǵyt­talǵanyn tilge tıek etti. Byltyrǵy jyly memleket bıýdjetinen múgedekterdi áleýmettik qoldaýǵa bó­lingen qarjy 128 mıllıard teńgeni qu­rapty. Alaıda, memleket qabyldaǵan is-sharalarǵa qaramastan, kúni-búginge deıin sheshimin tappaǵan máseleler bar. Má­se­len, múgedekterdi eńbekke ornalas­ty­rýda kezdesetin qıyndyqtardan bólek, olar­dyń ınfraqurylymdarǵa qol jetkizýin qamtamasyz etý jónindegi jumystar da óz deńgeıinde emes. Kezdesýde sóz alǵan Eńbek jáne ha­lyqty áleýmettik qorǵaý mınıstri Gúl­shara Ábdihalyqova múgedekterdi áleý­met­tik qorǵaý salasynda atqaryp jatqan jumystar týraly depýtattardy habardar etti. Mınıstr óz sózinde Qazaqstandaǵy múgedekter quqyqtaryn qamtamasyz etý jáne ómir sapasyn jaqsartý jónindegi ulttyq jospar jobasy aıasynda múge­dek­terdi aınaladaǵy ortaǵa, ınfraqurylym nysandaryna, kólik, aqparat jáne baı­la­nysqa, bilim berýge, densaýlyq saqtaýǵa, áleýmettik qyzmet kórsetý isine birdeı qol jetkizýin qamtamasyz etý sharalary júzege asyrylyp jatqanyn atap ótti. Bul kúngi talqylaý barysynda Qu­ry­lys jáne turǵyn úı-kommýnaldyq sha­rýa­shylyǵy isteri agenttiginiń basshysy S.No­kın, Kólik jáne kommýnıkasııa mı­nıs­tri­niń orynbasary R.Sklıar, Baılanys já­ne aqparat mınıstriniń orynbasary S.Sár­se­nov, Astana qalasy, Aqtóbe jáne Aqmola oblystary ákimdikteriniń ókild­e­ri, úkimet­tik emes sektordyń aktıvteri sóz sóıledi. Láıla EDILQYZY.