Aımaqtyq qolbasshylyqtyń baıqaý komıssııasy turǵyn úı jáne qyzmettik qordan turǵyn úımen qamtylýy, sondaı-aq áskerıler úıleriniń jan-jaǵy – tazalyǵy, abattandyrylýy, balalar oıyn alańynyń bolýy syndy máselelerdi sarapqa saldy. Baıqaý qorytyndysynda Aqtaý gornızonynyń áskerı qyzmetshileri birinshi oryndy ıelendi. Baıqaý nátıjesinde belgili bolǵandaı, eń úlgili úıler Aqtaý qalasyndaǵy 25744 áskerı bólimi men Beıneý selosyndaǵy 99116 áskerı bóliminiń jataqhanalary bolyp shyqty. Jýyrda ǵana paıdalanýǵa berilgen Beıneý selosyndaǵy áskerıler úıinde qazirgi tańda 25 otbasy turyp jatyr. Jaqyn arada taǵy bir paıdalanýǵa beriledi dep kútilýde. Sondaı-aq, Aqtaý teńiz jaıaý áskerleri óz turǵyn úılerine erekshe nazar aýdaryp, kútip ustaıtyny anyqtaldy. Bul úılerde keıbir turǵyndardyń turǵanyna bes jyldan asyp ketken, sondyqtan olar úıge asa uqyptylyqpen, kútimmen qaraıdy.
Baıqaý jeńimpazdaryna ydys-aıaq, elektr shaınekteri men maqtaý qaǵazdary tabystaldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
