Oblystyq bıýdjet týraly baıandaǵan ekonomıka jáne bıýdjetti josparlaý basqarmasynyń basshysy Arman Sábıtov oblys bıýdjet qarjysy kiris kózderin ulǵaıtý úshin basymdy sala retinde ónerkásip, kásipkerlik, aýyl sharýashylyǵyn damytýǵa jáne áleýmettik máselelerdi sheshýge baǵyttalyp otyrǵandyǵyn aıtty. Máselen, bilim berý salasyna jalpy 42,9 mlrd. teńge qarastyrylsa, densaýlyq saqtaý salasyna 19,5 mlrd. teńge, halyqty áleýmettik qoldaý salasyna 6,9 mlrd. teńge baǵyttalyp otyr. Sonymen birge, mádenıet jáne sport salalaryna 17,9 mlrd. teńge bólinse, turǵyndardy taza aýyz sýmen qamtý maqsatynda 33 jobany iske asyrý úshin 6,0 mlrd. teńge qarastyrylǵan. Osynyń nátıjesinde 16 joba iske qosylyp, 13 eldi meken aýyz sýmen qamtylyp, jalpy qamtylǵan eldi mekender sany 636-ǵa jetedi dep kútilýde.
Sonymen qatar, basqarma basshysy turǵyn úı salasy boıynsha 77 nysannyń qurylysyna 25,6 mlrd. teńge baǵyttalyp, jalpy alańy 208,6 myń sharshy metrdi quraıtyn 3 434 páterli 72 úı paıdalanýǵa beriletinin atap ótti.
Baqtııar TAIJAN,
«Egemen Qazaqstan»
