Komıtet hatshysy Darhan Káletaev otyrysty asha kelip, bul zań Memleket basshysynyń tapsyrmasy boıynsha qysqa merzimde ázirlenip, qabyldanǵanyn atap ótti. «Elimiz qaýipsizdiginiń zańnamalyq negizderin nyǵaıtý Parlament jumysynyń negizgi baǵyttarynyń biri bolyp tabylady. Osy saladaǵy zańnamalyq negizderdi jetildirý bul zulmatpen nátıjeli kúrestiń kepili bola almaıtynyn túsiný asa mańyzdy. Zańnamalyq negizderdi jetildirýmen qatar tıisti memlekettik organdar men úkimettik emes uıymdardyń, jurtshylyqtyń, azamattyq qoǵamnyń arasyndaǵy ózara is-qımyldy kúsheıtý máseleleriniń mańyzy zor», - dep atap ótti ol.
Senatorlar zań erejeleriniń tıimdi oryndalýyna, qoıylǵan mindetti sheshýdegi memlekettik organdardy úılestirýge, dinı ekstremızm men terrorızmdi eskertý jáne jolyn kesý jónindegi uıymdastyrý jáne is júzindegi sharalardy qabyldaýǵa qatysty birqatar saýaldar qoıdy.
Ulttyq qaýipsizdik komıtetiniń orynbasary Nurǵalı Bilisbekov baıandama jasady. Ol elimizde turaqtylyq qamtamasyz etilgeni, terrorıstik jáne ekstremıstik oqıǵalarǵa jol berilmegeni, 2017 jyly terrorıstik sıpattaǵy 11 zorlyqshyl oqıǵanyń aldyn alynǵany týraly habardar etti.
Ishki ister mınıstrligi ekstremızmge qarsy is-qımyl jónindegi departament bastyǵy Atyǵaı Arystanov mınıstrlik ekstremızmge jáne terrorızmge qarsy is-qımyl jónindegi qosymsha júıeli sharalardyń keshendi josparyn qabyldaǵanyn aıtty. «Qoıylǵan mindetti sheshý aıasynda 2016 jylǵy jeltoqsanda ishki ister organdaryna tergeýge jatqyzylǵan terrorıstik qylmystardyń jolyn kesý jónindegi tájirıbe qalyptasty. Bıyl ekstremızm jáne terrorızm kórinisterine baılanysty 322 derekke, onyń ishinde terrorızmdi nasıhattaý jónindegi 27 quqyq buzýshylyqqa sotqa deıingi tergeý júrgizildi. Sondaı-aq qylmys jáne radıkaldyq ortanyń ókilderiniń óristeýine jol bermeý jónindegi nysanaly sharalar júzege asyrylyp keledi. Bıyl paıdakúnemdik-zorlyqshyl qylmystarǵa mamandanǵan jáne teris aǵymdardy jaqtaýshylardan turatyn 22 qylmystyq top top ustaldy», - dedi A.Arystanov. Ol búldirgish aǵymdardy jaqtaýshylardyń quqyqqa qarsy isteriniń aldyn alý jáne jolyn kesý jónindegi jumystarǵa jergilikti polısııamen qosa barlyq ishki ister bólimsheleri tartylǵanyn atap ótti.
Senatorlar N.Nursıpatov, S.Jaqsybekov, T.Musabaev, T.Muqashev osy salany jetildirý jónindegi óz eskertpeleri men usynystaryn aıtty. Atap aıtqanda, dinı terrorızm men ekstremızmge qarsy is-qımylǵa, «Qazaqstan kıber qalqany» júıesin iske asyrýǵa, qarý-jaraq dúkenderiniń qyzmetine qatysty máseleler aıtyldy.
Depýtattar óz usynystaryn tıisti memlekettik organdarǵa jiberetin boldy.
