«Senimge» senýge bolady

Altekeń búginde ózi tańdaǵan kásibin «Egemendikpen ilese kelgen yrys» dep baǵalaıdy. Sóziniń jany bar. О́ıtkeni, táýelsiz elimiz tańdaǵan naryqtyq ekonomıka, jeke menshik úlesti baǵalaý degen saıasat kóptegen adamdar­dyń «ekinshi tynysyn» ashty. Talaı azamat­tardyń ishinde tunshyǵyp jatqan múmkin­dikterin syrtqa shyǵardy. Sonaý 1990 jyl áli este. Keńes odaǵynyń shańyraǵy shaıqalyp, josparly ekonomıka degenińizdiń byt-shyty shyqqan tusta zaýyt ta, fabrıka da qańyrap qalǵan. Jetpis jyl boıy «Keńes ókimeti ashtan óltirmeıdi» dep «jyr­lap» kelgen jumysshylar jetim balanyń kúıin keshti. Mine, sol kezde sanasynda sáýlesi bar Altynbek Sadyrbaev oń jambasyna keletin kásipti bastaýǵa bel baılap, «Kómek» degen ádemi atpen fırma ashqan. Bul olardyń táýelsiz el rynogyndaǵy táı-táılegen sábıdeı alǵashqy qadamy edi. Búginde fırmanyń irgesi nyǵaıyp, keregesi keńip, shańyraǵy bıikteı tústi. Oblys qana emes, elimizdiń túkpir-túkpirindegi qurylys jumystaryna belsene atsalysýǵa áleýeti jetetin alyp korporasııaǵa aınaldy. Dúnıege jańadan «Suńqar-2002» JShS men «Senim Korporasııasy» JShS keldi. Bulardy sol baıaǵy «Kómek» fırmasynyń isi men izin alǵa damytýshylar dese de bolǵandaı. Altynbek Sadyrbaev basqaratyn korpora­sııanyń táýelsizdiktiń 20 jyly ishinde atqarǵan sharýasy ushan-teńiz. Turar Rysqulov atyndaǵy aýdanda jer silkinip, mekeme ǵımarattary men turǵyn úılerdiń qulaǵany qulap, qulamaǵany jarylyp, sonyń saldarynan qarapaıym halyq qatty zardap shekken tusta qaıta qalpyna keltirý, kúrdeli jóndeý jumystaryna alǵashqy­lardyń biri bolyp kómek qolyn sozǵan Altekeńniń korporasııasy boldy. Atap aıtsaq, onyń ámbebap qurylysshylary Turar Rysqu­lov atyndaǵy aýdandaǵy 72 úıdi kúrdeli jóndeýden ótkizdi. Taraz qalasyndaǵy burynǵy Komsomol kólin jańa zamanǵa saı Zerbulaq dep atap, aınalasyn abattandyrýda atqarǵan ju­mys­tary da talǵampaz tarazdyqtardyń oıynan shyqty. Kóldiń borsyp ketken tabanyn tazalaý, sóıtip, birneshe jerden burǵyly qudyqtar qazý, kóldiń jaǵasyna qum tósep, jaǵajaıdy órke­nıetti elder úlgisine tán abattandyrý ju­mystaryna shák keltirýshiler bolǵan joq. Bir sózben aıtqanda, Zerbulaq qalalyqtardyń jazǵy demalys ornyna aınaldy. Oblystyq IID jedel basqarý ortalyǵynyń qurylysyn qolǵa alǵan da Altekeń. Tártip saqshylary úshin asa mańyzdy nysandy ol óte az merzimde sapaly atqaryp shyqty. Bireý bilip, bireý bilmeıtin osy nysandaǵy basqarý ortalyǵy arqyly búginde kósheler men kóshe qıylystaryndaǵy avtomobılder qozǵalysy baqylanady. Urlanǵan avtokólikterdiń baǵyt­tary anyqtalady. Sondaı-aq, korporasııa qury­lysshylary osy departamenttiń «Dınamo» sport keshenin de kúrdeli jóndeýden ótkizdi. Qyzylorda oblysynyń Qarmaqshy jáne Jal­aǵash aýdandaryndaǵy magıstraldyq kanal­dardy qaıta konstrýksııalaý jumystaryn da atqardy. Shý ózeni, Tasótkel men Teris-Ashybulaq toǵandarynyń jaǵalaýyn bekitip, nyǵaıtý jumystaryna da qatysty. Aıta bersek atqarylǵan jumys, sanaı bersek paıdalanýǵa berilgen nysandar jeterlik. Olardyń qatarynda oblystyq jáne qalalyq jedel medısınalyq járdem, sondaı-aq Shý qalalyq aýrýhanalarynyń ǵımarattaryn kúrde­li jóndeýden ótkizý jumystary da bar. Jaqynda Talas aýdanynyń Kóshek batyr aýylynda 150 oqýshyǵa arnalǵan eki qabatty jańa mektep ǵımaraty boı kóterdi. Ol úsh korpýstan turady. Onda oqý synyptarymen birge sport zal, ashana, jylyjaı jáne ǵımaratty jylytatyn qazandyq ta qarastyrylǵan. Mektep syrtynda fýtbol, basketbol alańdary da bar. Mektep túgeldeı qajetti qural-jab­dyqtarmen jáne jıhazdarmen jabdyqtalǵan. Sózdiń qysqasy, bilim ordasyn bastan-aıaq bitirgen korporasııa ujymyna aýdan, oblys basshylary da, aýyl turǵyndary da dán rıza. Búginde Taraz qalasynyń soltústik baty­synan «Báıterek» dep atalatyn shaǵyn aýdan boı kóterip, jańa zamanǵa laıyq sáýlet óneri­men salynǵan ásem úıler jurt kóńilin ózine aýdara bastady. Qurylys jumystary qarqyndy júrgizilýde. Qala turǵyndarynyń ıgiligine aınalatyn osy shaǵyn aýdandaǵy qurylys jumysyna da atalmysh korporasııa úlken úles qosyp otyr. Atap aıtsaq, Altekeńniń qurylys­shylary osynda 70 páterli bir turǵyn úıdiń jumysyn aıaqtap, endi ekinshisine aýysty. Qurylysshylar qajetti plastıkalyq esik, terezelerdi basqa jaqtan satyp alyp, korporasııa shyǵynyn kóbeıtpeıdi. Arzanyn izdep te áýre bolmaıdy. О́ıtkeni, «Arzannyń sorpasy taty­mas» degendeı, sapasyz taýarǵa urynýyń da múmkin. Sondyqtan qurylys nysandary úshin asa qajetti materıaldardyń bir bóligi korporasııa sehynda daıyndalady. Aldaǵy ýaqytta basqa da qajetti materıaldardy shyǵarý oılarynda bar. Altekeń oblys ákimi bastama ǵyp kótergen mesenattyq isterden de boıyn aýlaq salmaıdy. О́tken jyly korporasııa Taraz qalasynyń ortalyǵyndaǵy Qazybek bı kóshesine ornalas­qan kóp qabatty №49 úıdiń turǵyndaryn qýanyshqa keneltti. Iаǵnı, kompanııa qurylys­shylary birjarym aıdyń ishinde úıdiń aýla­syndaǵy 2700 sharshy metr jerge asfalt tósep, 970 qýma metr bordıýr qoısa, 276 sharshy metr jerdi qunarly topyraqpen tegistep, jasyl óskin tuqymyn septi. Sonymen birge, aýla ortasynan búldirshinderge arnalǵan túrli átkenshekter men syrǵanaqtar paıda boldy. Olardyń ata-analary úshin oryndyqtar qoıy­lyp, tennıs ústelderi ornatyldy. Bir sózben aıtqanda, №49 úıdiń turǵyndarynyń qýany­shynda shek joq edi. Al aýla... balalar merekesine aınalǵan. Ol merekeni kórip, halyqtyń qýanyshyn bólisýge oblys ákimi Qanat Bozym­baev ta keldi. – Eń birinshi – el aman bolsyn! Bizdiń isimiz­diń órge basýy sol aınalaıyn halyqtyń arqasy. Sondyqtan biz de eldiń bolashaǵy – balalar úshin qolymyzdan keletin jaqsylyqtan aıanbaımyz. Onyń ústine osy ıgi iske uıytqy bolyp, atqarylyp jatqan jumys barysyn qadaǵalap otyrǵan oblys, qala basshylaryna da rahmet, – degen sonda kóp qabatty turǵyn úıdiń aýlasyna 12 mıllıon teńgedeı jeke qarjysyn jumsaǵan kompanııa basshysy. Altekeń Balakúl ájesi týraly: «Túsimde Besaǵash aýylyna jol júrippin. Ol kezde seniń ákeń, meniń balam Jumabek aýyldyq keńestiń tóraǵasy. Túsimde tuman bolyp, adasyp ketippin. Tuman seıilgen kezde jan-jaǵyma qarasam aýyldyń ortasynda turmyn. Oń jaǵymdaǵy úıdiń aýlasynda bir báıterek ósip tur eken deımin. Al onyń basynda kók tý jelbirep tur. Oıana sala, Jumabegimniń úıinde bir ul dúnıege keledi eken, sol bala búkil áýletti asyraıdy eken» dep túsimdi jaqsylyqqa jorydym deýshi edi» dep únemi tebirene eske alady. Atasy Sadyrbaı qarııa Taraz qalasynyń Y. Súleımenov kóshe­sindegi aǵaıynǵa qamqor, elge syıly aqylman shal bolypty. Sol Sadyrbaı shaldyń «tentegi» Jumabek te zamandastary arasynda bedeldi bolǵan eken. «Ata kórgen oq jonar» degen, mine, Altynbek te atasy Sadyrbaı men ákesi Jumabek sııaqty tektilerdiń tárbıesin kórgenin tanytyp, búginde «Senim» korporasııasyn basqaratyn senimdi tulǵaǵa aınalyp otyr. Táýelsizdik qaı salada da talanttardyń baǵyn ashty. Kósemáli SÁTTIBAIULY. Taraz.