Qabyldanyp jatqan sharalar týraly ulttyq ekonomıka mınıstri Tımýr Súleımenov pen densaýlyq saqtaý mınıstri Eljan Birtanov baıandady.
Memlekettik jáne jergilikti atqarýshy organdar usynǵan aqparatqa sáıkes, 2017 jyldyń birinshi jartyjyldyǵynda 19 myńnan astam tutynýshylyq ótinishter qaraldy. О́tinishterge sáıkes 287 ákimshilik is qozǵalǵan.
«Kelip túsken ótinishterdi taldaý nátıjesi qazaqstandyq tutynýshylardyń óz quqyqtaryn bilmeıtinin jáne qashan ári kimmen baılanysýǵa bolatyny týraly jetkiliksiz habardar ekenin kórsetedi», — dep habarlady Tımýr Súleımenov.
Ulttyq ekonomıka mınıstri elektrondy saýdanyń serpindi damyp kele jatqan salalarynda tutynýshylardyń quqyqtaryn qorǵaýdyń óte tómengi deńgeıi baıqalatynyn atap ótti.
«Elektrondyq saýda salasynda taýarlardy elektrondyq satýmen aınalysatyn sýbektilerdi tirkeý tetigin engizýdi jáne tutynýshylardyń quqyqtaryn júıeli túrde buzatyn saıttarǵa sot sheshimimen tyıym salýdy usynamyz», — dedi mınıstr Tımýr Súleımenov.
Ulttyq tutynýshylar lıgasynyń usynysy boıynsha Tutynýshylardyń quqyqtaryn qorǵaý jónindegi úılestirý keńesi quryldy. Ulttyq ekonomıka mınıstrligi tutynýshylardyń quqyqtaryn qorǵaý zańnamasynyń saqtalýyn baqylaýdy júzege asyrý úshin ýákiletti organǵa quzyret berýdi usynady.
QR Densaýlyq saqtaý mınıstri Eljan Birtanov ónimderdi qaýipsizdik talaptarymen qamtamasyz etý boıynsha qabyldanǵan sharalar týraly baıandaı otyryp, mınıstrlik halyqtyń sanıtarlyq-epıdemıologııalyq salaýattylyǵy, gıgıenalyq normatıvter jáne tehnıkalyq reglamentter salasynda normatıvtik-quqyqtyq aktilerdiń talaptaryn buzýdy anyqtaýǵa jáne onyń aldyn alýǵa baǵyttalǵan baqylaý jumystaryn júrgizip jatqanyn atap ótti.
«Kameralyq baqylaý aıasynda 52 myńnan astam taýar pozısııasy shartty shyǵaryldy dep ákelingen syrtqy ekonomıkalyq qyzmettiń 50 josyqsyz qatysýshysy anyqtaldy, al deklarasııalanǵan jáne sertıfıkatalǵany bar bolǵany – 146. Osy SEQ-ke qatysýshylar ákimshilik jaýapkershilkke tartyldy, materıaldar sotqa berildi», — dedi mınıstr Eljan Birtanov.
Salystyrmaly taldaý elimizdiń ishki naryǵynda aılanystaǵy barlyq sáıkes kelmeıtin ónimderdiń neǵurlym úlken paıyzy ımport ónimderiniń úlesine tıesili ekenin kórsetti — 67,3%, otandyq óndirýshiler ónimi — 32,7%-dy qurady.
Máseleni qaraý qorytyndysy boıynsha QR Premer-Mınıstri Ulttyq ekonomıka mınıstrligine tutynýshylardyń quqyqtaryn qorǵaý týraly zańnamanyń saqtalýyn baqylaý tetigin qaıta qaraýdy tapsyrdy — «baqylaýshylardy tekserý» qaǵıdasyn joıý kerek.
Baqytjan Saǵyntaev tutynýshylardyń quqyqtary olardyń jetkiliksiz aqparattanýy sebebinen buzylatynyn atap ótti. Osyǵan oraı, Densaýlyq saqtaý mınıstrligine halyqtyń adam ómiri men densaýlyǵyna qoıylatyn qaýipsizdik talaptaryna saı kelmeıtin ónimder týraly habardar bolýyn qamtamasyz etý tapsyryldy.
