Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasyndaǵy basym baǵyttar men mindetterdi nasıhattaý maqsatynda «Atyraý-Aqparat» medıaholdıngi oblys kóleminde «Týǵan jer» etnomádenı jobasyn uıymdastyrǵan bolatyn. Osy etnomádenı is-sharalar kesheni aıasynda mektep oqýshylary arasynda «Ǵajaıyp ólke» atty oblystyq shyǵarmalar baıqaýy jarııalanyp, oǵan barlyǵy 314 talapker qatysty. Bolashaqta tilshi atanǵysy keletin osy talapkerlerdiń arasynan 40 jeńimpaz anyqtalyp, olar munaıly óńirde tuńǵysh ret ótkizilip otyrǵan «О́rimtal» jas tilshiler festıvaline joldama aldy.
Úsh kúnge sozylǵan sharada medıaholdıngtiń baspasóz ortalyǵynda festıvaldiń saltanatty túrde tusaýy kesilip, oǵan qatysýshylar oblystyq «Atyraý» jáne «Prıkaspııskaıa kommýna» gazetteriniń bas redaktorlary Isataı Balmaǵambetov pen Násip Shalabaeva bastaǵan jýrnalıstermen kezdesip, kókeılerinde júrgen kóptegen saýaldarǵa jaýap aldy. Batys óńirindegi eń iri medıaholdıng sanalatyn «Atyraý-Aqparat» seriktestiginiń tynys-tirshiligimen tanysty. Seriktestikke qarasty eki oblystyq basylymnyń tirshiligine, baspasóz ortalyǵy men jaqynda ǵana ashylǵan Medıa mekteptiń qyzmetine kýá boldy.
Oblystyq «Atyraý» telearnasynda qonaqta bolyp, túrli baǵdarlamalar daıyndaý jumysyna atsalysty.
Jas qalamgerler budan keıin tarıhy tereńde jatqan bilim ordasy – H.Dosmuhamedov atyndaǵy atyndaǵy Atyraý memlekettik ýnıversıtetiniń rektory, professor Abzal Taltenovtiń qabyldaýynda bolyp, bilim ordasyndaǵy oqý prosesimen tanysty. Joǵary oqý ornyn aralap, onyń jetistikterine kýá bolǵan oqýshylar bıyl ǵana óz aldyna jeke kafedra bolyp bólinip shyqqan «Jýrnalıstıka» kafedrasy týraly jan-jaqty maǵlumat aldy.
Festıval barysynda elimizge jáne óńirimizge tanymal jýrnalıster men qoǵam qaıratkerleriniń sheberlik synyptary men dáristeri de joǵary deńgeıde uıymdastyryldy. Uzaq jyldar boıy «Qazaqstan» ulttyq arnasynda eńbek etken tanymal telejýrnalıst, «Sheteldegi qazaq balalary» jobasynyń avtory ári prodıýseri Janar Baısemizova ótkizgen sheberlik synyby jas órenderge erekshe qanat bitirdi. Al, Qazaqstannyń eńbek sińirgen qaıratkeri, aqyn Aqushtap Baqtygereevanyń festıvalge Oral qalasynan arnaıy kelip, qatysýshylarǵa dáris ótkizýi – jastarǵa úlken syı boldy. Oblystyq jas tilshiler festıvali olarǵa gazet-jýrnal, telearna, bolashaq tilshilerdi oqytý jumystarymen keńinen tanystyryp qana qoımaı, oqýshylar men olardyń jetekshilerine mádenı-rýhanı demalys ta syılady.
Úsh kún boıy jas órkenderdiń qanattaryn qataıtyp, esten ketpes erekshe sátter men dýmanǵa toly qyzyqtardy syılaǵan tuńǵysh ret uıymdastyrylǵan jas tilshiler festıvali N.Jantórın atyndaǵy oblystyq fılarmonııada qorytyndylandy.
– Oblystyq jas tilshiler festıvalin uıymdastyrýdaǵy basty maqsat – jas jetkinshekterdiń boıyndaǵy týǵan el men jerge degen súıispenshilikti arttyryp, patrıottyq sezimderin janyp qana qoımaı, Isataı men Mahambet tulparlarynyń tuıaǵy dúbirletken Atyraý aımaǵynan shyqqan abyz Ábý, arystan júrekti Hamıt Erǵalıev, poezııa padıshasy Farıza Ońǵarsynova, jumbaq aqyn Jumeken, ult ustazy Zeınolla Qabdolov sekildi ulylardyń izin basqan jas órken tilshilerdi halyqqa tanytý, kórinbeı, kómilip jatqan altynnyń synyǵyn taýyp, bulaqtyń kózin ashý, elge jarqyratyp kórsetý, qabilet-qarymyna sáıkes jol silteý bolatyn. «О́rimtal» jas tilshiler festıvali – «Atyraý-Aqparat» medıaholdınginiń «Týǵan jer» etno-mádenı jobalary ishindegi eń mańyzdy sharanyń biri, – dep atap ótti festıvaldiń qorytyndy keshinde sóz alǵan medıaholdıng dırektorynyń orynbasary Raýan Sábıtuly.
Al, qoǵam qaıratkeri Aqushtap Baqtygereeva: «О́rimtal» jas tilshiler festıvali oblystyq deńgeıde ótkenimen, respýblıkamyzǵa tanymal basylymdardyń arnaıy júldeleriniń taǵaıyndalǵany, úmitterin úkilegen jas órenderdiń qazaq ádebıetinde, jýrnalıstıkasynda aıryqsha oryn alatyn tulǵalar atyndaǵy marapattarǵa ıe bolǵany, árıne, olarǵa úlken qoldaý boldy. Osynyń ózinen bul jobanyń qoǵam ómirine, jurtshylyqqa tıgizetin paıdasy kóp ekendig kórip otyrmyz. Elbasynyń «Bolashaqqa baǵdar: rýhanı jańǵyrý» maqalasy aıasynda uıymdastyrylyp otyrǵan shara ózge de óńirlerge úlgi bolsa dep oılaımyn», degen tilegin arnady.
Jas tilshiler festıvaliniń qorytyndysy boıynsha oǵan qatysýshylar «Egemen Qazaqstan», «Aıqyn», «Qazaq ádebıeti», «Qazaqstan Zaman», «Qazaqstan áıelderi», «Parasat» jáne «Qazaq gazetteri», «Jas órken», «Qazaq radıolary» seriktestikterine qarasty basylymdar men radıolardyń arnaıy júldelerine ıe boldy.
Jaryq kórgenine ǵasyrǵa jýyqtaǵan, alǵash ret óz oqyrmandarynyń qolyna «Ushqyn» degen atpen 1919 jylǵy 17 jeltoqsanda tıgen, sodan beri bul gazette ár jyldary Bernııaz Kúleev, Smaǵul Sádýaqasov, Júsipbek Aımaýytov, Muhtar Áýezov, Beıimbet Maılın, Sáken Seıfýllın, Turar Rysqulov, Oraz Jandosov, Ǵabıt Músirepov, Sherhan Murtaza, Ábish Kekilbaev syndy ultymyzdyń birtýar azamattarynyń qoltańbasy qalǵan el gazeti – «Egemen Qazaqstan» jalpyulttyq respýblıkalyq gazeti festıval jeńimpazdaryna arnap eki arnaıy júldesin taǵaıyndaǵan bolatyn.
«Egemen Qazaqstan» gazetiniń arnaıy júldelerin osy basylymnyń Atyraý oblysyndaǵy menshikti tilshisi, tanymal aqyn Baqytgúl Babash festıvaldiń eń jas qatysýshysy, №34 Atyraý qalalyq lıngvıstıkalyq gımnazııasynyń 6-synyp oqýshysy Ardaqtym Nıetqalıeva men Inder aýdanyndaǵy Boran Nysanbaev atyndaǵy atyndaǵy orta mekteptiń 10-synyp oqýshysy Álı Ǵalymovqa tabys etti. Barlyq jeńimpazdarǵa arnaıy syılyqtar berildi.
«Janam degen júrekke ot beremin» dep aqıyq aqyn Tólegen Aıbergenov jyrlaǵandaı, bul festıval bolashaq jas tilshilerge qanat bitirip, máńgilik esterinde qalatyny anyq.
Nursultan MYQTYBAI,
jýrnalıst
Sýretterdi túsirgen Ánýar ÁBILǴAZIEV.
Atyraý qalasy
