Ońtústik Qazaqstandaǵy biregeı jobalardyń biri bolyp tabylatyn bul ortalyqta bir mezette elý adamdy saýmalmen emdeýge qaýqarly. О́ńirdegi eń alǵashqy saýyqtyrý ortalyǵynyń ashylý saltanatyna sonymen birge oblystyq máslıhat hatshysy Qaırat Balabıev, «Nur Otan» partııasy OQO fılaly tóraǵasynyń birinshi orynbasary Nurmahan Joldasov bastaǵan halyq qalaýlylary qatysty.
Bul ortalyqta emdelýshilerdiń barlyq dertine qazaqtyń ulttyq sýsyny – qymyz em bolmaq. Munda demalýshylarǵa emdik ónimdi ázirleý úshin otyzdan asa bıe saýylady. Al, qymyzben emdeýdiń bir kýrsy on kúndi qurasa, árbir adam kúndigine bir lıtr saýmal ishýi tıis eken.
Elimizdiń táýelsizdik merekesine oraı, ońtústikqazaqstandyq emdelýshiler úshin esigin aıqara ashqan ortalyqtyń jumysyna sáttilik tilegen oblys ákimi barsha tólebılikterdi aıtýly merekemen quttyqtady.
«Búgin biz ulttyq sýsynmen emdeý ortalyǵynyń ashylýyna qatysyp otyrmyz. Bul nysannyń iske qosylýymen ishki týrızmdi damytýǵa, salaýatty ómir saltyn nasıhattaýǵa jáne halyqty taza tabıǵı ónimdermen qamtamasyz etý kózdelýde. Sonymen qatar, jańa jumys oryndary qurylyp, shaǵyn jáne orta bıznestiń damýyna óz septigin tıgizýde»,-dedi ákim.
Jalpy quny 500 mln teńgeni quraıtyn ortalyq bir kezeńde 50-ge jýyq adamdy qabyldap, emdeýge múmkindigi bar. Sondaı-aq, munda 15 azamat jumys isteıdi. Ortalyqta – saýmalmen emdeýden bólek, mıneraldy vannalar, jabyq basseın, tuzdy bólme, fınn monshasy, fıto bar, massaj, bıoptron jaryq terapııasy, atpen serýendeý qarastyrylǵan.
Bıe sútiniń shıpaly qasıeti onyń kóptegen aýrýlardan aldyn alýynda ekenin aıtqan mekemeniń quryltaıshysy Jarqynbek Tóltebaı tabıǵaty tamasha bul mekenge kelgen kez-kelgen adamnyń ózin jaqsy sezinýine taza aýa men qaıtalanbas tabıǵaty kepil bola alatynyn atap ótti. Sonymen qatar, ol qonaq úı tektes bul jaılarda búkil otbasyǵa arnap demalys uıymdastyrýǵa bolatynyn jáne tabıǵattyń adam organızmine jaǵymdy áser etýi úshin munda bar jaǵdaı jasalǵanyn jetkizdi.
Jalpy qymyz óndirý salasy aýdanda qarqyndy damyp, sońǵy 3 jylda jylqy basy 4500 jetken. Bul memlekettik qoldaýdyń arqasynda jetken jetistik. Sebebi, 2016 jyly memlekettik qoldaý sharalary 16 sharýashylyqqa kórsetilip, sharýalar jalpy 678 tonna qymyz óndirgeni úshin 26,8 mln. teńge sýbsıdııaǵa qol jetkizgen. Al, bıyl osy sharýashylyqpen aınalysatyndar qatary artyp 24 birlikti quraǵan. Búginde bularǵa 31,5 mln teńge kóleminde memleketten sýbsıdııa berilgen.
