Departament tóraǵasy orynbasarynyń málim etýinshe, qazirgi tańda memlekettik qyzmetkerlerdiń shtattyq sany – 5939, al qyzmettik laýazymda otyrǵandar – 5436 adam. О́tken jylmen salystyrǵanda qyzmettik laýazymdarǵa ornalastyrýda ósim baıqalyp, 89 paıyzǵa jetipti. Memlekettik qyzmetkerlerdiń ortasha jasy 39 bolsa, al 2000 jyly ol 41 jasty quraǵan. Búgingi tańda memlekettik qyzmette júrgenderdiń 88,5 paıyzy joǵary bilimdi. 2000 jyldary joǵary bilimdilerdiń qatary 62 paıyzdan aspaǵany taǵy belgili. Bul óz kezeginde memlekettik qyzmetshilerdiń sapalyq deńgeıiniń ósip kele jatqandyǵynyń kórsetkishi, deıdi Raıhan Ǵazızqyzy. Onyń aıtýynsha, memlekettik qyzmetkerlerdiń ortasha eńbek ótili 10 jyldy qurasa, laýazymda jumys isteý ótili 3,4 jyl. 2000 jyl bul kórsetkish 8 jyl deńgeıinde qalyptasypty. Sóz reti kelgende memlekettik qyzmetshilerdiń 64 paıyzy (3451 adam) áıelder ekendigin de aıta ketken oryndy.
«100 naqty qadam» Ult josparynyń «Kásibı memlekettik apparat qurý» baǵyty boıynsha atqarylǵan jumystarǵa keńinen toqtalǵan R.Brataeva tómengi laýazymdarǵa kandıdattardy irikteýde ońtaıly jaǵdaıdyń qalyptasqanyn jetkizdi. Sonyń nátıjesinde ótken jyldarmen salystyrǵanda jastardyń qatary arta bastaǵan (2015 jyly – 23 paıyz, al 2017 jyly 25 paıyzdy qurapty). Ústimizdegi jyldyń 9 aıynda ótkizilgen konkýrsta 688 adam memlekettik qyzmetke ornalastyrylsa, al tómengi laýazymdarǵa 360 adam qabyldanǵan.
Bıyl júrgizilgen ishki konkýrs nátıjesinde 246 memlekettik qyzmetshi laýazymdarǵa taǵaıyndalsa, sonyń jartysyna jýyǵy nemese 52,4 paıyzy joǵary laýazymǵa jyljytylypty.
Testileý erejesine engizilgen ózgeristerdiń nátıjesinde odan súrinbeı ótýshiler qatary arta túsken. 2015 jyly bul kórsetkish 32 paıyz deńgeıinde bolsa, 2016 jyly ol 49 paıyzǵa artqany kórinip tur. Bıylǵy test tapsyrý qorytyndysy boıynsha odan ótkenderdiń qatary 51 paıyzǵa jetken. Onyń ústine konkýrstyq komıssııa otyrystaryna mindettelgen baıqaýshylardyń qatysýy pikirlesý prosesine oń áser etpeı qoımady jáne de qatysýshylardyń jaýapkershiligin arttyrdy, deıdi departament tóraǵasynyń orynbasary.
Jas mamannyń mindetti synaq merziminen ótýi jónindegi norma da ózin aqtaǵandyǵymen bólisken R.Brataeva jańadan memlekettik qyzmetke kelip jatqan jas mamanǵa tálimgerdiń bekitilip berilýi onyń ujymǵa tez sińisip ketýine jáne jumysqa degen yńtasynyń oıanýyna oń yqpal etetindigin ortaǵa saldy. Bıylǵy jyldyń 9 aıynda 385 memlekettik qyzmetshige synaq merzimi belgilense, sonyń 265-i odan súrinbeı ótipti. Al qalǵan 19-y áli ótý kezeńinde júrgen kórinedi.
«100 naqty qadam» Ult josparynyń 10-qadamyn júzege asyrý barysynda 2016 jyldyń 1 qańtarynan bastap jańadan qabyldanǵan «Qazaqstan Respýblıkasyndaǵy memlekettik qyzmet týraly» zańyna sáıkes barlyq memlekettik organdar qyzmetkerleri test tapsyra bastaǵan. Ústimizdegi jyldyń 9 aıynda birinshi ret quqyq qorǵaý salasyna qyzmetke kelýshilerdiń 639 nemese 43 paıyzy testileýden ótkeni málim bolyp otyr. Jalpy, óńirde 3887 memlekettik qyzmetker attestattaýdan ótse, solardyń 91 paıyzy ózderiniń tıimdi jumys istep kele jatqandyqtaryn dáleldepti.
Asqar TURAPBAIULY,
«Egemen Qazaqstan»
Aqmola oblysy
