Oblys ortalyǵyndaǵy №35 «Ertóstik» balabaqshasynda ótken «Asyq party» oıynyna basqa balabaqshalardan kelgen 360 bala qatysty. Asyqtardy deneshynyqtyrý sabaǵynda emes, aınalamen tanysý, til damytý, matematıka sabaqtarynda da qoldanady. Doıbyny aq jáne qara tústi asyqtarmen oınaıdy, sandardy alyp-qosýdy da túrli-túske boıalǵan asyqtar ornatylǵan esepshottar arqyly meńgeredi. Tárbıeshiler halyqtyq pedagogıkanyń ádisterin qoldanýdy jetildirip, izdenis ústinde júredi.
Budan keıin oblys ortalyǵyndaǵy №10 Abaı atyndaǵy mektep-lıseıde qalalyq bilim bólimi men «Altyn saqa» bastamashyl tobynyń uıymdastyrýymen oqýshylar arasynda Asyq atý oıynynan qalalyq týrnır ótti. Uıymdastyrýshylar jarysty asyq oıynynyń túrlerine saı bóldi. Mysaly, qumar oıynǵa 2-4 oqýshydan qatysty. Oıynshylar kezek-kezek tórt asyqty ıirdi. Iirýshi tórt búk, tórt shik, tórt alshy, tórt táıke túsirdi de, júldeniń jartysyn aldy. Ekinshisinde, tórt asyq tórt túrli tústi, ıaǵnı tigilgen júldeni túgeldeı aldy. Júgiresiń, sekiresiń, terleısiń, kózdeısiń, tıgizesiń, eregisesiń, jeńesiń, jeńilesiń, utasyń, utylasyń. Báseke. Sheberlikke, mergendikke, batyldyqqa tárbıeleıdi.
Jalpy, týrnır ótken Abaı atyndaǵy №10 lıseı-mektebinde jyldar boıy oqýshylar asyq úıirmesine qatysyp keledi. Týrnırge qatysqan 11 mekteptiń arasynan 1-oryndy №35 Qabdykárim Ydyrysov atyndaǵy mektep oqýshylary ıelendi. Al 2-oryn Abaı atyndaǵy №10 lıseı-mektebi, 3-oryndy «Jas daryn» mektebiniń oqýshylary jeńip aldy. Jeńimpazdar men júldegerler dıplomdarmen, medaldarmen, aqshalaı jáne zattaı syılyqtarmen marapattaldy.
Oqýshylarǵa asyq oıynyn kásibı túrde úıretip júrgen Aqsý qalasyna qarasty Jambyl orta mektebiniń tehnologııa pániniń muǵalimi Jıenhan Qamanaıuly «Asyq party» jobasyn jalǵastyrmaqshy. Jıenhannyń aıtýynsha, asyq oıynynyń 80-ge tarta túri bar eken. Qazir sheńberge asyqty tizip, bir ǵana túrimen oınaıdy. Al úıirmege keletin Jıenhannyń oqýshylary asyq oıynynyń atý, qaǵý, qumar, at jarysy, hantalapaı, bes asyq, utý degen túrlerin úırenýde.
– Sondyqtan asyq oınaý jobasy bastalǵany durys. Endi bizge oıyn túrleriniń biryńǵaı standartyn bekitip, erejesin jasaý kerek. Ekinshiden, árbir jarys, týrnır ótkende osy erejege baǵyný qajet, – deıdi Jıenhan Qamanaıuly.
Ol aıtyp otyrǵan jobany jergilikti «Ertis Medıa» JShS dırektorynyń orynbasary Jumabek Smanov jazǵan-dy. Áleýmettik jelide taraǵan asyq oıyny jobasy jaıly aqparat balabaqshalarǵa da jetti. Iаǵnı «Asyq party» ınternet jobasy oı saldy degen sóz. Osydan keıin oblystyq «Ertis Medıa» JShS, «Naızatas» jýrnalynyń bas redaktory Asyl Ábishev bastaǵan óńirlik BAQ ókilderiniń tilshileri qoldap, joba bastaǵan-dy. Balabaqshalarda balalardy ulttyq oıyndarmen tanystyrý, asyq oınaýdyń túrlerine, halqymyzdyń salt-dástúrlerine olardyń qyzyǵýshylyǵyn oıatý maqsatyna oraı kótergen jobanyń usynystaryn ata-analar, balabaqshalar ujymy qoldady.
Jobany qoldaýshylardyń biri oblystyq mádenıet jáne qujattar, arhıvter basqarmasynyń basshysy Ardaq Raıymbekovtiń aıtýynsha, óńirimizde toǵyzqumalaq oıyny barlyq mektepte oınalady, jyl saıyn aýdandyq, oblystyq jarystar ótedi. Qyzyǵýshylyq basym, ulttyq oıynǵa degen qumarlyq bar. Sondyqtan aldaǵy ýaqytta mektepter men balabaqshalarda asyq oıynyn úıretetin úıirmelerdiń sanyn kóbeıtetin bolsaq, bul oıyndy da toǵyzqumalaq oıynynyń deńgeıine jetkize alamyz, – deıdi «Altyn saqa» bastamashyl tobynyń jetekshisi Asyl Ábishev.
Farıda BYQAI,
«Egemen Qazaqstan»
PAVLODAR
