Kesh aıasynda Janat Elshibektiń Ulttyq akademııalyq kitaphana daıyndaǵan «Bıblıografııalyq kórsetkish» pen «Folıant» baspasynan shyqqan «Besaspap» kitabynyń tusaýy kesildi. Sondaı-aq «Teńizben tamyrlas qalamger» atty derekti fılmniń kórsetilimi boldy.
Shyǵarmashylyq keshte «Egemen Qazaqstan» gazetiniń basshysy Darhan Qydyráli, Qazaqstan halqy Assambleıasy Tóraǵasynyń orynbasary Darhan Myńbaı, qalamgerler Jarylqap Beısenbaıuly, Janbolat Aýpbaev, aıtysker aqyn Baıanǵalı Álimjanov jáne taǵy basqa qalamdas dostary shyǵarmashylyq ıesi týraly tolǵamdy oılaryn ortaǵa saldy. Kesh tizginin jazýshy Álibek Asqarov ustady.
Taǵylymy mol sharanyń ashylý sózin Darhan Qydyráli sóılep, Janat Elshibekti 70 jyldyq mereıtoıymen jáne baspadan endi basylyp shyqqan qos kitabymen quttyqtady. Oqyrmany asyǵa kútip otyrǵan kitaptyń tusaýyn «Egemen Qazaqstan» gazeti AQ Basqarma tóraǵasy Darhan Qydyráli men Qazaqstan halqy Assambleıasy Tóraǵasynyń orynbasary Darhan Myńbaı kesti. Qos kitapta Janat Elshibek týraly qalamdastarynyń óleńderi, estelik maqalalary, pikirleri jarııalanǵan.
Sondaı-aq mereıtoı keshinde kórsetilgen «Teńizben tamyrlas qalamger» atty derekti fılm de jınalǵan qaýymdy bir serpiltip tastady. Bul fılm búgingi keıipkerimizdiń búkil bolmysy men beınesin taǵy bir qyrynan ashyp kórsetkendeı boldy.
Kesh sońynda mereıtoı ıesi sóz sóılep, jınalǵan qaýymǵa óz alǵysyn aıtty. «Men 70 jyldyq mereıtoıyma bir jyl daıyndaldym. Ishteı qobaljyp, qalaı óter eken dep ýaıymdap edim. Mine, arqasúıer dos-jarandarymnyń arqasynda búgingi kesh óte joǵary deńgeıde ótti dep oılaımyn. Bul keshtiń negizgi maqsaty da jas kezimde kezdesken dostarym men baýyrlarymdy bir shańyraq astynda jınap, syrlasyp qaıtsaq degen oı edi», deıdi Janat Elshibek.
Janat Elshibek aǵamyz 1978 jyldyń sáýir aıynan «Egemen Qazaqstan» gazetinde qyzmet istep, 1991 jyly redaksııanyń jaýapty hatshysy bolyp taǵaıyndaldy. Osy laýazymdy ol 2012 jyldyń maýsym aıyna deıin, ıaǵnı zeınetkerlik demalysqa shyqqansha jemisti de, abyroımen atqardy. «Egemendik» ardagerge áli de jazaryńyz kóp bolsyn degen tilek bildiremiz.
Álı BITО́RE,
«Egemen Qazaqstan»
Sýretti túsirgen
Erlan Omar,
«Egemen Qazaqstan»
