Qaıǵyly oqıǵa Mamlıýt aýdany Dýbrovnoe eldi mekeninde oryn alǵan. Olesıa Grýdınskaıa degen kelinshek 9 jastaǵy ulymen, emshektegi qyzymen jáne anasymen bir úıde turǵan. Ol birneshe jyl buryn kúıeýimen ajyrasyp, áke-sheshesiniń qolyna kóship kelgen. Sol kúni keıýana qyzy men úlken nemeresiniń dúkenge ketken mezetin paıdalanyp, dúnıe esigin ińgálap ashqanyna úsh apta ǵana bolǵan shaqalaqty tyr jalańash sheshindirip, janyp jatqan peshke tastap jibergen. Úıge oralǵan ekeý sábıdi tappaı qalyp, kúıik ıisin sezgennen keıin sandaryn biraq urǵan.
Aýyldastary L.Rýsalıevany araqqa qansha qumar bolsa da, janjal, aıǵaı-shý shyǵarmaıtyn, ózgelerdiń mazasyn almaıtyn momyn jan retinde sıpattaıdy. Nemeresi syrqattanyp, jergilikti aýrýhanaǵa túskende qatty ýaıymdaǵan kórinedi. Aýyldyq okrýgtyń ákimi Galına Shvesova da turmysy tómen sanattaǵylar otbasy retinde tirkelmegenin, tatý-tátti turǵandaryn, áleýmettik muqtajdyq kórmegenderin aıtady. Tek otaǵasy kóz jumǵaly beımaza kúıge túsip, ishkilikti toqtatpasa kerek.
Týǵan nemeresin tirideı otqa jaǵyp jiberip, sumdyq qylmysqa barǵan keıýananyń bul qadamy talaılardyń jaǵasyn ustatqan. Kúdikti sotqa bergen jaýabynda jantúrshigerlik qylmysqa qý araqtyń kesirinen bardym dep qansha aqtalýǵa tyryssa da, qyzy mundaı aıýandyq áreketke esh keshirim bolmaýyn, eń qatal jazany talap etti.
Zeınetkerge «asa qatygezdikpen adam óltirdi» degen aýyr aıyp taǵylyp otyr. Qylmysy dáleldense, qalǵan ǵumyryn abaqtyda ótkizýi múmkin.
О́mir Esqalı,
«Egemen Qazaqstan».
Soltústik Qazaqstan oblysy
