Olardyń qatarynda ǵylym, bilim, óner, densaýlyq saqtaý, sport salalarynyń belsendi ókilderi, mádenıet jáne óner qaıratkerleri boldy.
Mártebeli meımandar “Tárbıe jáne bilim”, “Atameken”, “Rýhanı qazyna” jáne “Aqparat tolqyny” aıasynda júzege asyrylyp jatqan jergilikti jobalarmen tanysty. Sándik-qoldanbaly qolóner buıymdaryn, qarý-jaraq, áshekeıler, qysh ydystar kórmesin tamashalady. 2017-2022 jyldar aralyǵynda óńirde “Atameken” jáne “Rýhanı qazyna” baǵdarlamalary aıasynda eki respýblıkalyq shara men 43 jobany, “Aqparat tolqyny” sheńberinde 282 jobany júzege asyrý josparlanǵan. Búginde “Áleýmettik bastamalar kartasy” jáne “Jomart júrek” baǵyttary boıynsha 1 mıllıard 297 mıllıon teńgeniń 8 jobasy men 126 sharasy iske qosylǵan.
Jerlesterdiń jyly júzdi kezdesýinde oblys ákiminiń orynbasary Madııar Qojahmet forým maqsaty Maǵjan elinen shyqqan azamattardy ósken ólkeniń búgingi tynys-tirshiligimen tanystyrý, óńirdiń órkendeýine úles qosqan jerlesterimizdi dáripteý maqsatyn ditteıtinin jetkizdi.
Evneı Býketov atyndaǵy Qaraǵandy memlekettik ýnıversıtetiniń kafedra meńgerýshisi, “Lıngva” til jáne aýdarma ınstıtýtynyń rektory Nursulý Ybyraıqyzy ózi ósken ólkeniń ystyq qushaǵyn qatty saǵynǵanyn jetkizdi. Ol Shal aqyn aýdanyndaǵy Sergeevqa qalasynda qańyrap bos turǵan ǵımarattardyń birin baspanasyz qalǵan azamattarǵa ýaqytsha pana bolatyn orynǵa aınaldyrý jónindegi josparymen bólisti.
“Geoterm” óndiristik kompanııasy” JShS dırektory, geologııa-mınerologııa ǵylymdarynyń kandıdaty, professor Dýlat Qalıtov otyz jyldan beri jyraqta júrse de, kindik qany tamǵan Esil aýdanyndaǵy Jarǵaıyń aýylynda “Danııar-agro” jaýapkershiligi shekteýli seriktestigin quryp, aýyldyq okrýgke 350 mıllıon teńge ınvestısııalyq qarjysyn quıypty. Jarǵaıyń, О́rnek, Mektep aýyldarynyń qyryqqa jýyq turǵynyn jumyspen qamtyp otyrǵan ol jýyrda sút jáne qymyz óńdeý sehyn iske qosqan. Kásipker ózge jerlesterin týǵan ólkege qoldaý kórsetýge shaqyrdy. Ataqty skrıpkashy Jámıla Serkebaeva óz sózinde “Rýhanı jańǵyrý” jalpyulttyq jobasynyń erekshelikterin atap ótti.
Forým sońynda “Úzdik kásipker – 2017” baıqaýynyń qorytyndysy shyǵarylyp, jeńimpazdar marapattaldy. Albına Qaıyrbekova, Aqmaral Jaqypova, Raýshan Mustafına, Iýrıı Pılıpýshko, Lıaıla Saıdasheva óz salalary boıynsha úzdik dep tanyldy.
О́mir Esqalı,
«Egemen Qazaqstan».
Soltústik Qazaqstan oblysy
