«Egemen Qazaqstannyń» arnaıy jobasy: Jasampazdyq jemisteri
Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady. Tómende Ońtústik Qazaqstan oblysynyń Otyrar aýdanynan fotoreportaj berilip otyr. 
“Uly Otyrar – qazaq órkenıetiniń altyn dińgegi”. Elbasymyz aıtqan osy qanatty sózde úlken maǵyna jatyr. Ejelgi Otyrar óz ýaqytynda álemdegi eń damyǵan qalalardyń biri bolǵan. Ábý Nasyr ál-Farabıden bólek, Farabtan shyqqan ǵulamalardyń ǵylymı eńbekteri álemdik órkenıettiń damýyna súbeli úles qosqan. Otyrar aýdanynyń ákimi Beıbit Syzdyqov “Prezıdentimizdiń tikeleı pármenimen “Mádenı mura” memlekettik baǵdarlamasy qabyldanyp, sonyń aıasynda “Kóne Otyrardy qalpyna keltirý” baǵdarlamasy qabyldanyp, aýdanymyzdaǵy tarıh jáne mádenıet eskertkishterin el ıgiligine aınaldyrýǵa múmkindik týdy” deıdi. Beıbit Shaldarulynyń aıtqanyndaı-aq ákim Qýanysh Aıtahanov óz kezeginde Otyrardyń jer astyndaǵy tarıhyn jer betine jarqyratyp shyǵarsa, Beıbit Syzdyqov keshegi men búginniń arasyn ádemi jalǵap jatyr. Aýdannyń áleýetin kóterip, sortań tartqan boz dalaǵa sý shyǵardy. Shaǵyn jáne orta kásipke ekpin berdi. Jaqynda Táýelsizdiktiń 20 jyldyǵy qarsańynda Otyrarda kúsh atasy Qajymuqannyń 140 jyldyǵy men ult rýhanııatynyń ustazy atanǵan О́zbekáli Jánibekovtiń 80 jyldyǵy laıyqty atalyp ótti. Alys jáne jaqynnan mártebeli qonaqtar kóp keldi. “Qobyz ben dombyra” kompozısııasynda ótken rásimnen soń, “Jibek joly” dańǵyly saltanatty túrde ashyldy. 
Táýelsizdik merekesine otyrarlyqtar erekshe daıyndyqpen kelipti. Aýdanǵa kireberiste oń jaqta “Qazaqstan Táýelsizdigine 20 jyl” atty saıabaqta qazaqtyń aıtýly úsh bıine asqaqtaǵan eskertkish ornatylǵan. Basqa da taǵylymdy dúnıeleri kóp. Zamanynda dúnıe júzi balýandary arasynda qazaq Qajymuqandy erkin eńserdim degen balýan bolǵan emes. Sport kesheni aldynda qazaq batyryna ornatylǵan eskertkish eldiktiń aıqyn belgisindeı tanylady. Qonaqtar Ábý Nasyr ál-Farabıdiń murajaıymen tanysqannan keıin, irgeles saıabaqta rýh sardary О́zbekáli Jánibekovtiń eskertkishin ashyp, gúl shoqtaryn qoıdy. Osy ólkedegi aqyn-shaıyrlar alleıasynan keıin О́zbekáli Jánibekovtiń murajaıy ashyldy. Sanaly ǵumyrynda qazaq jádigerlerin tirnektep jınap, ult mereıin asqaqtatýǵa bar kúsh-jigerin jumsaǵan tulǵa toıyna sonaý Qostanaı, Torǵaıdan qonaqtar kelipti. Murajaı janyna Jánibekovtiń qoly tıgen eki kıiz úı tigilip, ishine О́zekeńniń ózi tutynǵan kóne buıymdary, úı jabdyqtary qoıylypty. Sol kúni mádenı is-shara Mádenıet saraıynda ótken qos alyptyń respýblıkalyq ǵylymı-tájirıbelik konferensııasyna ulasty. Konferensııany 
О́.Jánibekovtiń táliminen ótken belgili ǵalym Qulbek Ergóbek júrgizip otyrdy. Onda Qazaqstan Kásipodaqtar federasııasynyń prezıdenti S.Muqashev, eńbek ardageri D.Bopova, akademık О́.Aıtbaıuly, Parlament Májilisiniń depýtaty Sh.Myrzahmetov, aqyn-jazýshylar M.Shahanov, N.Muqatov sııaqty azamattar sóz alyp, eki tulǵa jóninde taǵylymdy oılaryn aıtty. Aldaǵy ýaqytta atqarylatyn mindetter belgilendi. Osy keshte “Kóne Otyrar órkenıeti”, “Rýh sardary”, “Balýan baba” jáne “Otyrar alqabynyń aqyndary” atty kitaptardyń tusaýkeser rásimi ótti. Ondaǵan jyldardyń enshisine salsań da olqy bolmaıtyn osyndaı tabystarǵa Otyrar bir-aq jylda jetti. Bul – Táýelsizdiktiń tátti jemisi. 
Arnaıy betti daıyndaǵan «Egemen Qazaqstan» gazetiniń Ońtústik Qazaqstan oblysyndaǵy menshikti tilshisi Baqtııar TAIJAN, sýretterdi túsirgen Bereke QOIShYBAIULY.
