– Mardan byltyr qola júldege qol jetkizdińder. О́tken jylǵa ókpe joq shyǵar. Qolany qanaǵat tuttyńyzdar ma, álde odan da jaqsy nátıjege jetýge bolar ma edi?
– Kóp rahmet. Klýb basshylarynyń maýsym aldynda qoıǵan talaptaryn oryndadyq dep oılaımyn. Árıne, ońaı bolǵan joq. Qazirgi qazaq fýtbolynda «Astana» men «Qaıratqa» qaırat kórsetý qıyn. Qos klýbtyń qarjylyq múmkindigi, quramyndaǵy fýtbolshylardyń deńgeıi, áleýeti qalǵan komandalardan áldeqaıda joǵary. Muny moıyndaýǵa tıispiz. Bizge «Ertis» pen «Tobyldy» tize búktirý mańyzdy boldy. Barlyq oıyndarda múmkindiginshe upaı joǵaltpaýǵa kúsh saldyq. Shúkirshilik etemiz. Qolaǵa qoldaý kórsetken qalyń jankúıerlerimizdiń arqasynda qol jetkizdik.
– «Ordabasy» Eýropa lıgasynyń irikteý kezeńinde eki jyl qatarynan sátsiz oınap keledi. Sebebi nede dep oılaısyz?
– Ras. Sátsiz oınadyq. «Shırokı Brıeg» komandasyn jeńýge tıis edik. Sonshalyqty myqty qarsylas emes-tuǵyn. Fýtbol bolǵan soń jeńis te, jeńilis te qatar júredi. Bıylǵy maýsymda bul sátsizdikti boldyrmaýǵa tyrysamyz. «Astana» komandasy sekildi qazaq jankúıerlerin jetistikterimizben qýantqymyz keledi.
– «Astana» demekshi, elorda klýbynyń jetistikterin qalaı baǵalaısyz. Basqa komandalarymyzǵa Eýropa alańdarynda joǵary deńgeıde oınaýǵa ne kedergi?
– Birinshiden, elorda ujymynyń Eýropa lıgasynyń 1/16 kezeńine ótýi keremet jetistik. «Slavııamen» bolǵan oıyndy kórdik. Jankúıer boldyq. Qazaq komandasy myqtylardyń qataryna qosylǵanyna qýandyq.
Ekinshiden, bul basqa komandalarymyzǵa serpin beredi dep oılaımyn. «Qaıratty» da bolashaqta bıikterden kóretinimiz anyq. Bizdiń aýylda da irgeli jeńister bolady dep úmittenemin. Sol maqsatta bar kúsh-jigerimizdi salýǵa daıynbyz. О́tken oıyndardan qorytyndy shyǵaryp, bıylǵy jyly barynsha bıik belesterdi baǵyndyrýǵa jumys isteımiz.
– Mardan, endi jeke ózińizdiń oıyndaryńyzǵa toqtalsaq. Maýsymda 26 oıyn ótkizip, tórt gol soqtyńyz. Oıyndaryńyzǵa kóńilińiz tola ma?
– Birjaqty jaýap berý qıyn. Sátti de, sátsiz de kezdesýler boldy. Negizi, qalaı oınaǵanymnyń naqty baǵasyn fýtbol jankúıerleri beredi dep oılaımyn. Bapker men jankúıerlerdiń seniminen shyǵý úshin oınaımyz. Jeke óziminiń kórsetkishterimdi emes, komandamyzdyń jeńisin basty nazarda ustaımyn. Eger múmkindik bolyp jatsa, gol soǵýǵa da tyrysamyn.
– Barlyq goldaryńdy aıyp dobyn oryndaý arqyly soǵypsyń. Keremet. Aıyp dobyn soǵýdyń syrlarymen bólisseń. Arnaıy jattyǵý jasaıtyn bolarsyń?
– Syry joq (kúlip). Jasyrmaımyn, jattyǵýdan soń, ózim qalyp jarty saǵattaı daıyndyǵymdy pysyqtaımyn. Jalpy, jattyǵýsyz eshqandaı nátıjege qol jetkizý múmkin emes. Menińshe, barlyǵy eńbektiń arqasynda keledi. Sondyqtan sheberligimdi arttyrý úshin qosymsha eńbektenemin.
– Áńgimeńizge rahmet.
Áńgimelesken
Erkebulan JOMART,
«Egemen Qazaqstan»
