Qabanbaı aýyldyq okrýginiń ákimi Qalıhan Nurymbaev, Úrjar aýdandyq jumyspen qamtý jáne áleýmettik baǵdarlamalar bólimine qarasty Qabanbaı aýyldyq bólimshesiniń qyzmetkerleri Baǵdagúl Temirǵalıeva men Aqmaral Shaqabaeva apaılarynyń turmysyn jaqsy bilgendikten aýdan ákimi Serik Zaınýldınmen, aýyldastarymen aqyldasyp Elbasynyń «Rýhanı jańǵyrý» maqalasy aıasynda keıýanaǵa turǵyn úı salyp berýdi uıǵardy.
Qart anaǵa turǵyn úı kiltin tapsyrýǵa arnalǵan jıynǵa aýyldastary túgel keldi. Aýyl ákimi Q.Nurymbaev saltanatty jıyndy ashyp, Elbasynyń «Bolashaqqa baǵdar: rýhanı jańǵyrý» maqalasynda adamdarǵa áleýmettik jaǵdaı jasaý, olardyń turmysyna kóńil bólý jaıly aıtylǵanyn eske sala ketti. Budan keıin aýyl ákimi turǵyn úı salýǵa qolǵabys jasaǵan abzal jandarǵa alǵysyn bildirdi. Alakóldiń jaǵasyndaǵy kásipkerler 250 myń teńge jınap beripti. Mardan aqsaqal basqaratyn aqsaqaldar alqasy – 65, aýyl aqsaqaldary Muqan Omarǵalıev, Erkinbek Qalıpanov, Serik Januzaqov, aýyldyń bas ımamy Marat qajy, «Dorojnık», «Sansyzbaı» demalys úıleriniń basshylary, «Manas» qojalyǵynyń ıesi qomaqty qarjy qosqan. Aýyl azamaty Meırambek Dáýlethanov brıgadasymen kelip úıdiń taǵanyn quıyp berdi. «Kóp túkirse kól» degendeı, aqyry tóbesi jabylǵan, aýlasy shirigen aǵashtardan tazartylǵan, kózdiń jaýyn alatyn turǵyn úı paıdalanýǵa berildi.
Aýdan ákiminiń orynbasary Serik Sádýaqasov Qabanbaı aýylynyń turǵyndaryna, áleýmettik sala qyzmetkerlerine qarııaǵa jasaǵan qamqorlyǵy úshin rızalyq bildirdi. Qart ananyń qýanyshyn bólisken jerlesteri syılyqtaryn da ala kelgen eken. Iаǵnı kilem, ydys-aıaq, turmysqa qajet zattardy tabaldyryqqa úıip tastady. Aqmaral Shaqabaeva uzaq ýaqyt boıy ájeni qamqorlyǵyna alyp, kómektesip kelipti. Qys mezgilinde mekteptiń tımýrshylary qar kúrep, otynyn jaǵyp, sýyn tasyp beredi eken. Ol óz sózinde aldaǵy ýaqytta da anaǵa qolǵabys jasaı beretinin tilge tıek etti. Al qart áje ózine qamqorlyq jasaǵan aýdan, aýyl basshylary men jerlesterine alǵysyn bildirip, kózine jas alǵan kezde kópshilik qaýym tolqyp ketti.
Aýyl turǵyndary G.Qurmanovanyń jańa úıine kirip, shashý shashty, dastarqannan dám tatty.
Ońdasyn ELÝBAI,
jýrnalıst
Shyǵys Qazaqstan oblysy,
Úrjar aýdany
