О́tken jyly qańtardyń orta sheninde Aqsýattaǵy «Nur Otan» keńsesi ornalasqan ǵımarattyń aldyn qardan tazalaý sátin jýrnalıstik áýestikpen sýretke túsirip alǵan edim. Sol jerdiń kórinisin bıyl qańtardyń on úshi kúni baryp taǵy da sýretke túsirdim. Eki jylǵy sýret eki túrli. Byltyrǵy sýrette kommýnaldyq qyzmet jumysshylary qalyń qarmen «arpalysyp» jatyr. Bıylǵy sýrette qar túspegen ashyq alań qarasha aıyndaǵydaı sııaqty.
Qazaqta «Kókjıekten kóterilgen býdaq bult kók júzin japsa, attyń qara qaptalynan keletin qar jaýady» degen nanym bar. Kóktemge deıin áli talaı ýaqyt bar. Kójıekten býdaq bult ta kóteriler, kók júzin jabar, attyń qara qaptalynan kelmese de óz mólsherimen aq mamyq qar da jaýar. Qys bastalǵaly qolyna kúrek ustamaǵan aqsýattyqtar bilekterin sybanyp, alaqandaryna túkirip qar kúreýge de shyǵar.
Hamza SÁTIEV,
Qazaqstannyń qurmetti jýrnalısi
Shyǵys Qazaqstan oblysy,
Tarbaǵataı aýdany,
Aqsýat aýyly
