Jıyn barysynda Respýblıkalyq fızıka-matematıka mektebiniń dırektory Ǵabıt Bekahmetov halyqaralyq olımpıadalar boıynsha Qazaqstan quramasy jaqsy nátıjeler kórsetip kele jatqanyn jetkizdi.
«10-11 synyptarǵa arnalǵan matematıka, fızıka jáne ınformatıka pánderinen ótken XIV halyqaralyq Jáýtikov olımpıadasynyń qorytyndylary boıynsha Qazaqstan quramasynyń oqýshylary 60 medaldyń ıegerleri atandy. Onyń ishinde 7 altyn, 16 kúmis, 37 qola. Olımpıada Qazaqstan Respýblıkasy Bilim jáne ǵylym mınıstrligi jáne Almaty qalasy ákimdiginiń qoldaýymen ótti. Jáýtikov olımpıadasy 14 jyl ishinde álem boıynsha tanyldy. Osy jyly oǵan taıaý jáne alys sheteldiń eń myqty mamandandyrylǵan 72 mektebi qatysty. Qazaqstan, Reseı, Belarýs, Grýzııa, Armenııa, Qyrǵyzstan, О́zbekstan, Tájikstan, Túrikmenstan, Bolgarııa, Rýmynııa, Serbııa, Túrkııa, Iran jáne Indonezııadan 482 oqýshy keldi. Olımpıada ótetin RFMM 46 jyl boıy Qazaqstandaǵy jáne TMD elderi arasyndaǵy jetekshi fızıka-matematıkalyq mektepterdiń biri bolyp tabylady. Qazaqstan atynan qatysqan 22 komandanyń ishinen Almaty qalasynyń RFMM eń joǵary nátıje kórsetti jáne mektep komandalarynyń reıtınginde qurmet gramotasyn aldy», dedi mekeme basshysy.
Sonymen qatar ol osy olımpıada tapsyrmalarynyń avtorlary retinde Nazarbaev Ýnıversıtetiniń, MMÝ-diń, Máskeý fızıka-tehnıkalyq ınstıtýtynyń, Erevan memlekettik ýnıversıtetiniń, Belarýs memlekettik ýnıversıtetiniń eń myqty professorlary, Google jáne National Laboratory Astana qyzmetkerleri qatysqanyn jetkizdi.
Raýan QAIDAR,
«Egemen Qazaqstan»
