Aýrý ákesiniń aýyr hali mektep oqýshysy Erlandy kóp alańdatatyn. «Dáriger bolsam kómegim tıer edi» degen balalyq peıili ony Atyraý medısına kolledjine alyp keldi.
Oqýǵa tústi, biraq ákesin ajaldan arashalaı almady. Kolledjdi támamdaǵan soń Jylyoı aýdanynyń shalǵaı bir aýylyna medısına qyzmetkeri bolyp jumysqa ornalasty. Biraq ne istese de jany tynym tappaıtyn jas jigit aýylda eki jyldan artyq turaqtaı almady. «Zańger bolýym kerek» dep bir kúnde mamandyǵyn aýystyrýǵa bel býyp, jolǵa shyqty. Onyń da oqýyn oqyǵanmen, jýrnalıstıka álemi tartty da turdy. Alǵaýsyz armannyń jeteginde Máskeýge deıin baryp, bilim aldy. Oblystaǵy mádenı sharalardyń bel ortasynda belsendilik tanytyp júrdi. Alaıda qyzyldy-jasyl ómir de Erlannyń jan qalaýyn taýyp bere alǵan joq.
...Taǵdyr shyǵar. «Taǵdyr shyǵar» dep jazý bizge árıne ońaı. Al júreginiń shyn qalaýyn tapqanynsha taǵdyrdyń qatal synaǵynan ótken Erlan úshin aýyr dertpen, azappen, ajalmen arpalysý ońaıǵa soqpaǵany aıan. Biraq ol jeńdi. Qaterli isikpen kúreste qajyrlylyq tanytty. «Reseıdiń Samara qalasyndaǵy emhanada jatqanymda ıtterdiń kómegimen sal aýrýyna shaldyqqan balalardy emdeýge bolatynyn kórdim. Bul jaǵdaı maǵan oı saldy. Aýrýhana tóseginde jatyp «Eger osy aýrýdan jazylsam, muqtaj adamdardan járdemimdi aıamaımyn, qaıtsem de adamdarǵa jaqsylyq jasaımyn» degen úlken maqsatpen qaýyshtym. Meni sol maqsat tósegimnen turǵyzdy desem de bolady», deıdi Erlannyń ózi.
Aýyr kúnder artta qaldy. Aýrýynan aıyǵa bastady. Alaıda ózine-ózi bergen sertin umyta almady. «Qaıtsem de...» deıtin tistenip. О́mirdiń dámin tatyp ta úlgermesten qıyn jaǵdaıǵa dýshar bolǵan sábılerdiń móldiregen kózderi men analarynyń jaýtańdaǵan janary janyna tynyshtyq bermedi. Aqyry «Atyraý. Malenkaıa strana» qoǵamdyq qoryn quryp, bas mıy men julynyna zaqym kelgen balalarǵa qoldaý kórsetý ortalyǵyn ashty. Bul – 2012 jyl edi.
Sodan beri bir tynym tappaǵan Erlan Kúmisqalıev búginge deıin 300-den astam balaǵa kómek kórsetip úlgerdi. Labrador tuqymdas Forbs pen Fedıa atty ıtteri senimdi serikterine aınaldy. Aıaq-qoldarynyń bar ekenin de sezbeıtin qanshama bala osy ádis arqyly turyp, júrip ketkenine mysal az emes. Aýrý bala baqqan ananyń da júregi sherli. Onyń ústine, balasy sal bolyp týǵan analardyń jetpis paıyzdan astamy jalǵyzbastylar eken. Al barlyq em-domdy tegin júrgizetin Erlan analarǵa arnap ortalyqtan túrli úıirmeler ashqan. Endi kanısterapııany qoldanysqa engizýdi josparlap júr. Bul oıyn oblys basshylyǵy maquldap, ortalyq ǵımaratyn salýǵa jer telimin bóldi. Aldaǵy kóktemde ıppoortalyq ashylady. Osylaısha Erlannyń «Janym aman qalsa, jer betine izgiliktiń dánin sebemin» degen oıy ońynan oryndalyp keledi.
Erlan Kúmisqalıev búkilhalyqtyq daýys berý nátıjesimen «Qazaqstannyń 100 jańa esiminiń» qataryna endi. Elbasymen kezdesý qurmetine ıe boldy. Jaqynda Atyraý oblystyq «Rýhanı jańǵyrý» jobalyq keńsesiniń uıymdastyrýymen bir kezderi ózi bilim alǵan medısına kolledjine baryp, jastarmen júzdesti. «Jetistik formýlasy» atty sharada ómirinen syr shertip, basynan ótken jaıttardy baıandady.
Eshnárse kezdeısoq emes. Múmkin Erlannyń basynan keshken qıyndyqtary ony osy jolǵa, densaýlyǵy dimkás sábılerdiń qamqory, qorǵany bolýyna daıyndaǵan shyǵar. Qazir onyń 300-den astam balasy bar. Em qonsa degen aq úmitpen aldyna keletin ár balanyń jansyz aıaǵyna jan bitip, kishkene saýsaqtarymen qolyn qysqan sátterde ol ózin dúnıedegi eń baqytty jan sezinedi. О́mirge qushtarlyq degen adamdarǵa, aınalaǵa meıirim men mahabbattyń shoǵyn úrleý shyǵar, bálkim?
Baqytgúl BABASh,
«Egemen Qazaqstan»
ATYRAÝ
