Baǵdarlamada AQSh prezıdenti Donald Tramppen túski as, sondaı-aq Holokost mýzeıin jáne Anakosta-Bolıng áskerı bazasyn aralaý sharalary qarastyrylǵan. Sapar Anakosta-Bolıng áskerı bazasynan bastalyp, BUU QK múshelerine ballıstıkalyq zymyran fragmentteri men basqa da qarý-jaraqtar tanystyryldy.
AQSh prezıdenti Donald Tramptyń atynan uıymdastyrylǵan Aq úıdegi túski asqa Memlekettik hatshy Reks Tıllerson, Aq úıdiń apparat basshysy Djon Kellı jáne ulttyq qaýipsizdik jónindegi keńesshi Gerbert Makmaster, qatysty. Sharada halyqaralyq beıbitshilik pen qaýipsizdikke tóngen qaýip-qater, sonyń ishinde KHDR-di ıadrolyq qarýsyzdandyrý, Sırııadaǵy shıelenis pen terrorızmge qarsy kúres máseleleri talqylandy.
AQSh prezıdenti Aýǵanstandaǵy jaǵdaıdy erekshe atap ótti. Ol Talıban qozǵalysy sodyrlarynyń beıbit turǵyndardy óltirip, lańkestik jasap jatqanyn atap ótti.
Qazaqstannyń turaqty ókili Qaırat Omarov BUU QK tóraǵasy retinde sóz sóıleı otyryp, Prezıdent N.Nazarbaevtyń qańtardaǵy AQSh-qa jasaǵan sapary barysynda Prezıdent D.Tramppen tabysty kezdeskenine basty nazar aýdaryp, qol jetkizilgen kelisimderdi oryndaý boıynsha júrgizilip jatqan jumystar týraly baıandady.
Osyǵan baılanysty Aq úı basshysy sapardyń sátti ótkenin tilge tıek etip, Prezıdent N.Nazarbaevqa sálem joldady. Sapar sońynda BUU QK músheleri Sırııalyq shıelenistiń qurbandaryna arnalǵan Holokost mýzeıindegi kórmede boldy.
