Astana qalalyq Qazaqstan halqy Assambleıasynyń hatshylyǵy men Astana qalasy ákimdigi janyndaǵy «Qoǵamdyq kelisim» memlekettik mekemesiniń qoldaýymen ótken sharada Elbasynyń bıylǵy Joldaýyndaǵy negizgi basymdyqtar, sondaı-aq etnosaralyq únqatysýdy qalyptastyrýdaǵy Qazaqstan halqy Assambleıasynyń róli keńinen sóz boldy.
Jıynda Astana qalalyq QHA hatshylyǵynyń meńgerýshisi L.Qusaıynova: «Prezıdent óz Joldaýyndaǵy jetinshi baǵytta el birligin nyǵaıtýdaǵy negizgi basty mindetterdiń biri adam kaptıaly týraly atap ótti. Bul rette Elbasynyń Qazaqstan jastarynyń úsh tildi meńgerýine basa nazar aýdarǵanyn eskerýimiz qajet. О́ıtkeni úsh tildi meńgerý adam kapıtalyn damytýdyń negizgi baǵyty bolyp tabylady», dedi.
Astana qalalyq QHA ǵylymı-sarapshylyq tobynyń tóraǵasy, tarıh ǵylymdarynyń doktory V.Salahov óz kezeginde Qazaqstan Prezıdentiniń basshylyǵymen elimiz damyp, álemdik deńgeıdegi jetekshi memleketter tarapynan laıyqty baǵasyn alǵanyn aıta kelip, «Memleket basshysynyń árbir Joldaýy halyqty biriktirýge baǵyttalǵan. Sondyqtan biz Elbasy Joldaýyn qoldaýǵa jáne ony is júzinde tııanaqty oryndaýǵa tıispiz. Álem qazaq halqyn ejelden kele jatqan qarapaıymdylyǵy men danalyǵyna baılanysty qurmet tutady. Mundaı laıyqty qurmetke biz Prezıdentimizdiń basshylyǵy arqasynda qol jetkizdik. Sondyqtan Elbasynyń Joldaýyna qoldaý bildirip, adal nıetpen talmaı eńbek etýimiz qajet», degen oıyn jetkizdi.
Astana qalalyq QHA Qoǵamdyq kelisim keńesiniń tóraǵasy, L.N.Gýmılev atyndaǵy Eýrazııa ulttyq ýnıversıteti halyqaralyq qatynastar fakýltetiniń professory Á.Álpeıisov: «Qazirgi kezde tórtinshi ónerkásiptik revolıýsııany sóz eter bolsaq, onda biz shıkizatqa degen qyzyǵýshylyqtan alshaqtap, óndiristi qarqyndy damytýǵa basymdyq berýimiz kerek. Sonyń nátıjesinde shıkizatqa táýeldi bolmaı, belgili bir jetistikterge qol jetkizemiz. Ári óndiristik revolıýsııa negizinde óz ómirimizdi jaqsarta alamyz», dedi.
Sonymen qatar basqosýda «Turan-Astana» ýnıversıteti ekonomıka kafedrasynyń professory, Astana qalalyq QHA ǵylymı-sarapshylyq tobynyń múshesi O.Álıev, Astana qalalyq QHA tóraǵasynyń orynbasary, «Van» armıan etnomádenı birlestiginiń jetekshisi S.Salýmıan, QHA múshesi, Astana qalalyq «Vaınah» etnomádenı ortalyǵynyń tóraǵasy S.Geroev, «Qazaqstandaǵy uıǵyrlardyń respýblıkalyq etnomádenı ortalyǵy» QB tóraǵasynyń orynbasary R.Abdýsalamov sóz sóıledi. Olar N.Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynyń mańyzdy isterdiń tııanaqty oryndalýyn mindettegen strategııalyq qujat bolyp sanalatynyn, sondyqtan barshamyzdyń Joldaýda atap kórsetilgen mindetterdi oryndaýǵa belsene atsalysýymyz qajettigin, aldymyzda Elbasy aıqyndap bergen on baǵytta jumyla jumys isteý mindeti turǵanyn sóz etti.
Sondaı-aq basqosýǵa qatysýshylar bıylǵy Joldaýdyń jastardy qoldaýǵa baǵyttalǵanyn, osy oraıda jastarǵa úlken jaýapkershilik júktelip otyrǵanyn, ásirese olar ındýstrııany sıfrlandyrý jáne jańa tehnologııany engizý isine belsendi túrde atsalysýy kerektigin atap kórsetti. Jıynda sóz alǵan etnostar ókilderiniń aıtýynsha, taǵdyrdyń talaıymen Qazaqstan jerine kelgen kezde jáne odan keıin de ózderine árdaıym qoldaý kórsetip kele jatqan qazaq halqynyń tili men tarıhyn bilý mańyzdy.
Joldybaı BAZAR,
«Egemen Qazaqstan»
