Shymkent qalasyn tolyqtaı aralaǵan, barlyq uńǵyl-shuńǵylyn biletin oblys ákimi Janseıit Túımebaev jaıaý júrginshilerge arnalǵan «Arbat» jobasynyń qaı jerlerde ornalasatyndyǵyn belgilep berdi.
Qalany qaq ortasynan qıyp Qoshqarata ózeni ótedi. Jerdiń astyn jaryp shyqqan, el aýyzynda áýlıe Qoshqarata bulaǵy atalatyn sý jaǵalaýyna burynǵy ákim Asqar Myrzahmetovtiń ýaqytynda demalys orny ornalastyrylǵan bolatyn.
Qysy-jazy bir temperatýrada aǵatyn Qoshqarata bulaǵynda jyldyń tórt mezgilinde adam úzilmeıdi. Ásirese aptaptyń mıdy saharaǵa salǵandaı qaınatqan ýaqyttarynda turǵyndar «balyq» bolyp ketedi.
Endi Qoshqarata jaǵalaýynan bólek Beket batyr, A.Asqarov jáne Beıbitshilik kósheleri de «Arbat» jobasyna endi.
«Arbat» jobasy áýeden túse qalǵan joq. Qala turǵyndarymen jıi júzdesken oblys basshysy osy usynysty kóbirek estigen. Sondyqtan da Janseıit Qanseıituly osy kósheler boıynda ornalasqan dámhanalardyń birine toqtap, turǵyndarmen bir shynyaıaq shaı ústinde taǵy da pikirlerin tyńdady.
«Arbat» jobasy boıynsha shahar turǵyndarynyń demalys kúnderi ýaqytyn jaqsy ótkizýine jaǵdaı turǵyzylady. Qolóner sheberleri, sýretshiler kórmesi, kádesyı sııaqty shaǵyn dúkender jumys jasaıdy. Qazaq ultynyń salt-dástúrleri men ádet-ǵurpyn kórsetýge de múmkindik týǵyzylady. Halyq ánderi men áýesqoı sazgerlerdiń shyǵarmalaryn tyńdaýǵa jaǵdaı jasalynbaq.
Jalpy, byltyr Ońtústikte otyzdan astam eskızdik jańa jobalar bekitilgen. Olardyń qatarynda óńirdegi týrızmdi damytýǵa baǵyttalǵan eskızder, sondaı-aq Shymkent qalasyndaǵy jańa áýejaı jáne temir jol vokzaly men shahardaǵy kóp qabatty turǵyn úı keshenderiniń jobalary bar.
Oblystyq sáýlet jáne qala qurylysy basqarmasy basshysynyń orynbasary Baqtybaı Dúısebekov sáýlettik jobalardyń arasynda Túrkistan qalasyndaǵy tarıhı-mádenı týrızmdi damytý tujyrymdamasy, «Qasqasý» demalys aımaǵy, Shymkent qalasyndaǵy shatqaldardy kógaldandyrý men jaıaý júrginshilerge arnalǵan «Arbat» tıpindegi joldar, «Eski qala» aýmaǵy bar ekendigin aıtady.
«Rýhanı jańǵyrý» baǵdarlamasyna sáıkes oblys aýmaǵyndaǵy 500 eskertkish anyqtalyp, onyń ishinde 100 nysannyń tizimi oblystyq mádenıet basqarmasymen birlesip jasalǵan. Olardyń qatarynda aýdan ortalyqtarynda salynatyn «Dostyq úıi» jobasy, «Qazyǵurt» tarıhı-etnografııalyq kesheni, «Karaýyl- tóbe», Qoshqarata ózeniniń boıyn jáne «Ordabasy» memorıaldyq tarıhı-mádenı keshenin abattandyrý men kógaldandyrý, «Kóne Túrkistan» qalashyǵyn qalpyna keltirý, «Uly dala» saıabaǵynyń nobaıy syndy jobalar ázirlendi», deıdi ol.
Bıyl Ońtústikte osyndaı irgeli jumystar atqarylatyn bolady.
Baqtııar TAIJAN,
«Egemen Qazaqstan»
Ońtústik Qazaqstan oblysy
