«Táýelsizdik dáýiri». Tereń tanym, mol maǵlumat

Biraq sol eleń-alań shaqtaǵy táýe­l­sizdikti aıaqtan turǵyzyp, nyǵaıtý jolyndaǵy kól-kósir eńbek, tógilgen ter, azamattardyń tegeýrindi is-qı­myly, qajyr-qaıraty týraly bilgenmen, árbir istiń qandaı qıyn­dyq­tarmen júzege asqandyǵyn jetik, árbir ýaqytty naqpa-naq bile bermeıtinimiz aqıqat. Búginde táýelsizdiktiń nyǵaıýyna, elimizdiń irgesi berik el bolýyna eńbek etip, óz úlesimizdi qosyp júrgenimizge qýanamyz jáne táýelsizdik týraly taǵylymdy áńgimelerdi qurmetpen tyńdaımyz.

Memleket basshysynyń «Táýelsizdik dáýiri» atty shyǵar­ma­sy – eleń-alań shaqtan búgingi qalyptasyp, álem elderine Qazaqstandy tanytýǵa deıingi júrip ótken joldyń jeńil bolmaǵandyǵyn, ol úshin jumsalǵan kúsh, Elbasynyń mańynda judyryqtaı jumylyp birge júrgen azamattar týraly jan-jaqty bilýge múmkindik beredi.

Kitaptyń súbeli tórt bólimi, onyń ishindegi ár taqyrybynyń ózi talaı tarıhtan taǵylym berer bólimderi keshegi kúnimizdiń jazba beınesi, bolashaǵymyzdyń jarqyn dańǵyly ispetti. Búgingi qazaqstandyqtar elimizdiń erteńine nyq senimmen qaraı­ty­nymyz, memleketimizdiń nyǵaıýy úshin, táýelsizdigimizdiń baıandylyǵy úshin eńbek etip, óz úlesimizdi qosyp júrmiz dep sanaıtynymyz aqıqat. Kóńilge selkeý túsirmeıtin bul senimniń, aldymyzǵa asqaq maqsat-mindet qoıa bilgen bul jigerdiń bas­ta­ýy qaıda jatyr degen suraq týyndaıdy. Qazirgideı álem el­derin daǵdarystyń, ashtyqtyń, soǵystyń – túrli zulmattyń shyr­maýy shyrmaǵan tynyshsyz kezeńde qabyrǵaly elimiz, keń-baı­taq jerimiz, parasatty basshymyz bolmasa, erteńge senim artý turmaq, búgingini baǵamdap-boljaýdyń ózi múmkin bolmas edi.

«Táýelsizdik dáýiri» – memleket basshysy N.Nazarbaevtyń Qazaqstandy keleshekke jetelegen kemel saıasatynyń naqty kórinisi. Biz sengen, biz arqa súıegen alyp kúshtiń qaıdan bastaý alyp turǵandyǵyn osy kitaptan oqyp bilýge bolady. Ǵalymdarymyz, azamattar kitapqa «Táýelsizdik ensıklopedııasy» degen ataý berýde, rasynda kitap óz paraqtaryna táýelsizdik, onyń máni, elimizdiń táýelsizdikke qol jetkizýi men qıyn jyldar, búgingi qalyptasqan kezeń týraly jan-jaqty derekti, tereń málimetti, sansyz suraqtardyń jaýabyn toǵystyrýymen bul ataýǵa barynsha laıyqty basylym.

Búgingi Qazaqstan jańǵyrýdyń úsh tolqynyn basynan ótkerip, tarıhtyń, taǵdyrdyń synyna jutylyp ketpeı julqy­na, órshelene alǵa qulash sermegen, sol syndardan shıryǵyp shyǵyp, álem nazary aýǵan bıik minbelerden mańyzdy ún qata bil­gen, tórinde alqaly jıyndar ótkizip, nátıjesinde mamyrajaı mámilelerge uıytqy bola alǵan, óziniń aıqyn jolyn tań­daǵan nyq memleket. San ulttyń ókili bir shańyraq astynda tatý-tátti ómir súrip, bir memlekettiń tilegin tilep, bir mem­le­ket­tiń damýyna úles qosyp, onyń tynyshtyǵyn bir kisideı kú­ze­týimen ózgelerdi qaıran qaldyryp, beıbitshiliktiń besigi, aýyz­birliktiń úlgisi bolǵan el.

«Táýelsizdik dáýiri» – baq qonaqtaǵan baıtaq elimizdiń baıan-she­jiresi, el men jerdi tanımyn degen zamandastarymyzdyń da, keler urpaqtyń da tushynyp oqıtyn týyndysy dep bilemin.                      

Pánııa SARMÝRZINA,
Mańǵystaý oblystyq mádenıet basqarmasy basshysynyń mindetin atqarýshy

Mańǵystaý oblysy