Árıne, «100 aýyl birden jańa júıege kóship ketti, bári jaqsy, bári keremet» dep alaqan ysqylaýǵa áli erte shyǵar. Bul rette áýelgi kezde ártúrli qıyndyqtar men túsinispeýshilikterdiń oryn alatyny da jasyryn emes. Osyndaı olqylyqtarǵa jol bermes úshin jyl basynda jergilikti ózi-ózi basqarýdy engizý boıynsha respýblıkanyń ár óńirinde Prezıdent janyndaǵy memlekettik basqarý akademııasynyń 16 fılıaly ashylǵan-dy. Mundaı fılıal 4 qańtarda О́skemende de óz jumysyn bastady. «Áýeli 50 ákimdi oqytamyz, olardyń ózi eki kezeńmen oqıtyn bolady. Ekinshi lekte taǵy elý ákim keledi. Ákimder buryn aınalyspaǵan bıýdjettik baǵdarlamalardy jasaýda qatelikterge jol bermes úshin olqylyqtyń aldyn alý joldaryn úıretemiz. Oqý bitken soń da ákimder jergilikti jerde jumysty bastaǵanda bizdiń qyzmetkerler onlaın rejımde keńes berip, qoldaý kórsetedi. Bolashaqta magıstratýra bólimi, qashyqtyqtan oqytý júıesi ashylýy múmkin», – deıdi fılıal dırektory Janar Ryspekova.
Ákimderdi oqytý demekshi, bul baǵyttaǵy jumysty Shyǵys Qazaqstan oblysy elden buryn bastap ketti deýge bolady. Jaqynda jańa júıege kóship jatqan óńirdegi 50 ákimge arnalǵan alǵashqy dáristi aımaq basshysy Danıal Ahmetovtiń ózi oqydy. Oblys ákimi óz sózinde Prezıdent júktegen mańyzdy mindetti iske asyrý úshin aımaqta elimizde alǵash bolyp «Jergilikti basqarý júıesinde kásibılikti damytý semınary» atty arnaıy baǵdarlama, ıaǵnı pılottyq joba ázirlengenin atap ótti. Baǵdarlama memlekettik prosestiń tarıhı damý konteksindegi qazaqstandyq memlekettiliktiń qalyptasýy, memlekettik jáne úkimettik baǵdarlamalardy memlekettik josparlaý jáne iske asyrý, aýyldyq aımaqtardy damytýǵa, problemalary men olardy sheshýge memlekettik qoldaý tetikterin paıdalaný jáne kommýnaldyq menshikti basqarý sekildi 4 bloktan turady eken. «Memleketik menedjer retinde sizder aýmaqtaryńyzdaǵy áleýmettik-ekonomıkalyq máselelerdi sheshesizder. Bıyl derbes bıýdjet aldyńyzdar. Semınar boıynsha alǵashqy dáristi men oqydym. Endi ár basqarmanyń basshysy Sizdermen tikeleı jumys isteıtin bolady. Olar tıisti materıaldardy daıyndady. Is-áreket algorıtmin de jasap beredi. Al Sizderge tek sol boıynsha naqty jumys isteý qajet. Berilgen múmkindikti paıdalanyp, durys jumys isteı bilýdi úırenińizder. Sebebi, aldaǵy ýaqytta memlekettik baǵdarlamalardyń basym bóligin iske asyrý Sizderge baılanysty bolmaq», - dedi D.Ahmetov.
Aımaq basshysy óz dárisinde Memleket basshysy Nursultan Nazarbaevtyń táýelsiz Qazaqstan memleketin qurý, qalyptastyrý jolyndaǵy eńbekterine de keńinen toqtaldy. «Táýelsizdik jyldarynda Qazaqstan álemdegi damyǵan 50 eldiń qataryna qosyldy. Osylaısha «Qazaqstan-2030» strategııasy merziminen buryn oryndaldy. Qazir «Qazaqstan-2050» strategııasyn jáne «100 naqty qadam» Ult josparyn qolǵa alyp otyrmyz. Qarap otyrsaq, egemendik alǵanymyzǵa 26 jyl ǵana bolsa da, osy kezeńde elimiz ózge memleketter ǵasyrlar boıy júrip ótken joldy eńserdi. Biz óte kúrdeli, biraq qyzyqty jáne qubylmaly kezeńde ómir súrip otyrmyz. Meniń zamandastaryma úlken tarıhı ózgeristerge, aıtýly oqıǵalarǵa qatysý jáne tikeleı aralasý qurmeti buıyrdy. Bıylǵy Joldaýda da Elbasy aldymyzǵa on naqty mindetti qoıdy. Ony iske asyrýǵa barsha qoǵam bolyp jumylamyz», - dedi oblys ákimi.
Azamat QASYM,
«Egemen Qazaqstan»
О́SKEMEN
