Rashıd Qulbatyrov – sýret ónerinde ózgelerge uqsamaıtyn, ózine ǵana tán ádemi ıirimderimen erekshelenetin daryn ıesi. О́nerdegi áriptesteri ony «tabıǵat landshaftary men qala ansamblderiniń jyrshysy» dep beker aıtpasa kerek. Qylqalamyn asa sheberlikpen jeńil tartatyn onyń kenebinen Qazaqstan men Eýropanyń úlkendi-kishili qalalarynyń panoramalaryn, qazaq dalasynyń shetsiz de sheksiz jazırasyn, Ile Alataýyndaǵy jotalardyń bıik shyńdaryn, Kaspıı teńiziniń ásem kórinisin, kóshpendilerdiń dástúrli aýyldarynyń turmystyq kompozısııalaryn kóptep kezdestirýge bolady. Sýretshiniń kartınalary Kanada, Amerıka, Germanııa, Fransııa, Túrkııa, Grekııa jáne Chehııada jeke kolleksııalarda saqtaýly.
«Shabyt» avtordyń aýqymdy jeke kórmesiniń ǵana emes, onyń shyǵarmashylyǵyn biriktiretin tujyrymdamanyń da ataýy ispetti. Qulbatyrov shyǵarmashylyǵyn qadirleýshiler keskindemeshiniń akvareldiń kúrdeli ári talǵaýly tehnıkasyn asa sheberlikpen meńgergenin aıtady.
– Sýretshiniń shyǵarmashylyǵynda qala peızajy janrynyń alar orny úlken. Rashıd Almatynyń jańa dańǵyldary men eski kóshelerin ǵana sýrettep qoımaıdy. Onyń qala peızajdary galereıasynda Almatydan basqa Aqtaý, Atyraý, Aqtóbe, Mańǵystaý, Ystanbul, Rım, Rýan sııaqty qalalar men qala mańynyń jáne ózi saıahattap barǵan jerleriniń kórinis-kelbetin sýretteıtin peızajdary da bar. Rashıd Qulbatyrov jumystaryn kóbinese plenerge shyǵyp, tabıǵat aıasynda jazǵandy jany súıedi, sebebi bul – onyń shyǵarmashylyǵyna dem beretin qýat kózi. Qala men onyń mańyn jazǵanda Rashıd joramalǵa jol bermeıdi, ıaǵnı dalaly jer men taýly jerdegi aýyldardy, olardyń ómir tirshiliginiń ereksheligin qosa baıandaǵan kezde, shyǵarmashylyq proseske tolyǵymen berilip, endigi jerde qylqalamymen emes, janymen jaza bastaıdy. Adam júreginiń genetıkalyq jady bar desedi. Kóshpendiler urpaǵynyń boıyndaǵy qan dala adamdarynyń tynysh ári emin-erkin ómir yrǵaǵyn rahattana baıandaıtyn keskindemeshiniń shyǵarmashylyq oıymen birge jyljı aǵady, – deıdi kórme jetekshisi Oksana Tanskaıa.
Joǵaryda aıtqan qala peızajdary men dala landshaftary, kóshpendiler turmysy men adam taǵdyry jaıly shaǵyn baıandaýlar onyń áleminde múlde bólek qyrynan kórinis tabady. Ashyq, qanyq túster kóktem men kúzge ózgeshe reń berip kórermendi ózine tarta túsedi. Aqpan aıynyń sońyna deıin jalǵasatyn kórmege qoıylǵan ár shyǵarma avtordyń sýret ónerine degen bıik paıymyn ańǵartatyndaı.
Paıymmen jazylǵan peızajdar...
Arman OKTIаBR,
«Egemen Qazaqstan»
ALMATY
