Sol tusta atom elektr stansasyndaǵy apatty joıýǵa alyp derjavanyń túkpir-túkpirinen eriktiler men jumysshy jasaqtar legi aǵylyp kelip jatty. Al qýatty ızotoptardan bólingen qaterli sáýle aýaǵa jyldam tarap, qorshaǵan ortany ýlap, turǵyndar men qutqarýshylardyń densaýlyǵyna orasan zııan tıgizdi. Sodan beri shırek ǵasyrdan astam ýaqyt ótse de, Chernobyl apatynyń júrekterge salǵan jarasy jazylǵan joq. Ásirese, apatty aımaqta bolǵan adamdardyń sany jyl saıyn azaıyp bar jatqany qasiretti shyndyq...
Chernobyl atom elektr stansasyndaǵy qutqarý jumystaryna Qazaqstannan 32 myńnan astam adam qatysqan eken. Al olardyń arasynda Almaty oblysynan 2 myńnan astam azamat bolǵan. О́kinishtisi, búginde sol tizimdegi adamdardyń deni túrli syrqattan kóz jumǵan, qazir oblysta 602 azamat turyp jatyr.
Jaqynda Taldyqorǵan qalasynda Chernobyl apaty qurbandaryn eske alýǵa jáne Almaty oblystyq «Chernobyl ardagerleri men múgedekteri» qoǵamdyq birlestiginiń qurylǵanyna 25 jyl tolýyna oraı «Erlikke taǵzym» atty saltanatty jıyn ótti. Jınalǵandar qurban bolǵandardy bir mınýt únsizdikpen eske alyp, orasan apattyń saldaryn joıýǵa qatysqandarǵa taǵzym etti. Osy sharada sóz alǵan Almaty oblysy ákiminiń birinshi orynbasary Lázzat Turlashov:
- Chernobyl apaty búkil álemge atom energııasynyń baqylaýdan shyǵyp ketse qandaı kúıge ushyratynyn kórsetip berdi. Sonymen qatar bul qaıǵyly oqıǵa óz ómirlerin aıamastan apattyń zardabyn joıýǵa atsalysqan adamdardyń erik-jigeri men batyrlyq úlgisin de tanyta aldy, -dedi.
Saltanatty shara marapattaý rásimimen jalǵasyp, tıisti marapattar tabystaldy.
Qalmahanbet MUQAMETQALI,
«Egemen Qazaqstan»
Almaty oblysy
