Ulttyq ónerdi ulyqtaǵan keremet saıystyń kýágeri bolýǵa kelgenderdiń qarasy qalyń boldy. Jańa ereje boıynsha barlyq búrkitshi tek at ústinde júrip óner kórsetti. Búrkitshiler alǵashqy irikteý kezeńinde qusty at ústinen qolǵa qondyrý, shyrǵa tartý sııaqty ónerlerin kórsetip synǵa tústi. Al, kelesi kezeńge ótken búrkitter qoıan men túlkige shapsa, qarshyǵa men ıtelgiler qolǵa shaqyrylyp, kógershin aýlady. Bul jerde tek qustyń syny emes, qusbeginiń kıim úlgisine de aıryqsha mán berildi.
Jarys qorytyndysy boıynsha, eń joǵary upaı jınaǵan 13-jasar búrkitshi Beksultan Seıitjan úzdik dep tanylyp, bas báıgege tigilgen 200 myń teńgeni enshilese, upaı sany boıynsha ekinshi orynnan kóringen almatylyq Ǵabıt Tańat 150 myń teńgeni qanjyǵasyna baılady. Úzdik úshtikti túıindegen Murathan Dáýlethan 100 myń teńge qarjylaı syılyqqa ıe boldy. Uıymdastyrýshylardyń sheshimi boıynsha 4, 5, 6-oryndardy ózara bólisken Armanbek Kúntýǵan, Baqdaýlet Babajan, Almas Seıitjan esimdi qusbegilerge de arnaıy dıplommen qosa aqshalaı syılyqtar tabystaldy.
– Jarys óte joǵary deńgeıde ótti. Árıne, ońaı bolǵan joq. Birinshi oryndy kez kelgen qyran qusy ala bermeıdi. Sol úshin men ózimniń qusym «Hantáńirge» alǵys aıtamyn. Men bul qusty baptap júrgenime bes jyl boldy. Qazir ózim on úshtemin, aldaǵy ýaqytta da basqa týrnırlerde baǵymdy synap kórmekpin. Babalarymyzdan qalǵan asyl murany jas urpaq ary qaraı jalǵaýymyz kerek, – deıdi jarys jeńimpazy Bekasyl Seıitjan.
Búrkitterden bólek, saıatqa qarshyǵa men ıtelgi qustary da shyǵyp, kógershin aýlaǵan bolatyn. Bul básekede Dáýren Arshabaı, Araı Serikbaeva, Sultan Seıitjanbek, Medet Shálipov, Berikbolsyn Babajan, Nurbaqyt Báken esimdi qusbegiler jarys júldegeri atandy. Olardyń qatarynda eń jas qatysýshy retinde kózge túsken qos Almatylyq Alǵazız Ǵalymbekuly men Ersultan Jumaǵul arnaıy syılyqqa ıe boldy.
«Qyran» Federasııasynyń atqarýshy dırektory Baǵdat Múptekeqyzynyń aıtýynsha, osydan on jyl buryn Almaty oblysynda búrkitshilerdiń alǵashqy mektebi qurylǵan tusta respýblıkada bar joǵy 15-aq búrkit bolǵan. Qazir bul ónermen áýestengenderdiń sany 100 den asyp jyǵylady. Jyl saıyn qusbegilik óneri keńge qanat jaıyp, qyran ustap, baptaıtyndardyń sany artyp keledi.
Eske salsaq, mundaı jarys Almatyda alǵash ret 1988 jyly kórshiles qyrǵyz, túrkimen elderiniń qatysýymen ótken bolatyn. «Qyran 2018» atty bul is-shara Almaty qalasy Dene shynyqtyrý jáne sport basqarmasy jáne «Qyran» Federasııasynyń qoldaýymen uıymdastyrylyp otyr.
Arman OKTIаBR,
«Egemen Qazaqstan»
ALMATY
