Jıyndy ashqan Máýlen Áshimbaev partııalyq jańǵyrýdyń basym baǵyttaryn atap ótip, alda turǵan mindetterdiń aımaqtyq deńgeıde de asa mańyzdy ekenine nazar aýdardy. Partııa Tóraǵasy birinshi orynbasarynyń aıtýynsha, nurotandyqtar elimizde qolǵa alynǵan júıeli ózgeristerdiń negizgi qozǵaýshy kúshi bolýy kerek. Sol úshin aldymen partııanyń negizgi mindetin anyqtap, ıdeologııalyq jumystyń baǵyt-baǵdaryn aıqyndap alý kerektigin aıtqan Máýlen Áshimbaev: «Biz búginde kóbine ishki jumystarǵa basymdyq berip, solarmen ǵana shektelip qalǵandaımyz. Tipti, keıbireýler Ortalyq apparatqa quddy bir mınıstrlik, al partııanyń aımaqtardaǵy fılıaldaryna jergilikti ákimdikterdiń bir bólimindeı qaraıdy. Bul Elbasymyzdyń partııanyń aldyna qoıǵan maqsat-mindetteri men atqarar rólin durys túsinbeýdiń saldarynan bolyp otyr. Memleket basshysy: «Nur Otan» – mınıstrlik te, atqarýshy bılik te emes. Ol – strategııalyq kúsh», – dep partııanyń baǵyt-baǵdaryn anyqtap berdi. Sondyqtan biz jumysy júıeli ári tıimdi, mindeti aıqyn strategııalyq kúsh bolyp qalyptasýymyz kerek», dedi.
Máýlen Áshimbaev partııanyń jańa baǵytta jumys istep, naqty nátıjelerge qol jetkizýi úshin qalyptasqan ádis-tásilder men formatty ózgertýdi usyndy. Birinshi kezekte partııa jumysyna debıýrokratızasııa qajet ekenin de tilge tıek etti. Bul, árıne óńirlerge de tikeleı qatysty bastama. Sondyqtan jergilikti jerlerde nurotandyqtar ózderin partııa sheneýnigi emes, halyqpen ashyq ári tikeleı jumys isteıtin partııa múshesi retinde kórsete bilýi tıis. Partııalyq is-sharalardy taptaýryn nusqadan aryltyp, qoǵammen saıası baılanysty jańasha qarqynmen qaıta ornatýdyń da mańyzy zor. Nurotandyqtardyń uıymdastyrýymen ótetin ár is-shara mándi, mazmundy, kreatıvti bolyp qana qoımaı, naqty nátıjege qol jetkizýi kerek.
Sondaı-aq jıynda ıdeologııalyq jumystarda óńirlerdiń «Rýhanı jańǵyrý» baǵdarlamasyna basymdyq berýi kerektigi aıtyldy. Osy turǵydan kelgende Qazaqstandaǵy jetekshi saıası kúsh sanalatyn «Nur Otan» partııasy qundylyqtar men jańǵyrý ıdeıasynyń jarshysy retinde ár qazaqstandyqqa onyń máni men mańyzyn túsindirýi tıis. «Qazirgi tańda «Nur Otan» partııasy kóz aldymyzǵa úlken bir sport saıysynda jeńiske jetip, keıin jattyǵýdy umytqan, óz ózimen jumys isteýdi múldem toqtatqan, aldaǵy maqsat-múddelerin ysyryp qoıyp, kúndelikti kúıbeń tirlikten aryla almaı ómirdiń aǵysymen ǵana jyljyp kele jatqan sportshyny elestetedi. Sondyqtan barshamyz ol sportshynyń qaıtadan es jıyp, qarqyndy jattyǵýyna, maqsattaryn aıqyndap, fızıkalyq qana emes ıntellektýaldy turǵyda da ózin-ózi qolǵa alýyna jáne naǵyz chempıon bolýyna kúsh jumsaýymyz kerek. Bul – bizdiń aldaǵy ýaqyttaǵy basty mindetimiz. Osy jolda bárimiz judyryqtaı jumylýǵa tıispiz», dedi partııa Tóraǵasynyń birinshi orynbasary.
Sonymen qatar M.Áshimbaev óńirlik fılıaldar men bastaýysh partııa uıymdarynyń aldynda turǵan basty mindetterge nazar aýdardy. Eń aldymen, partııa ókilderi óz óńirlerindegi qoǵamdyq-saıası jaǵdaıdy tolyq baqylaýda ustaýy tıis. Halyqty alańdatqan máselelerdi der kezinde anyqtap, jedel áreket etip, keıin ony partııalyq deńgeıde sheshýdiń joldaryn usynýlary kerek. Soǵan oraı arnaıy Áleýmettik júktemeler kartasy daıyndalmaq. Barlyq partııalyq jobalardyń ózektiligi artyp, jańa bastamalar qolǵa alynatyn boldy. Osy rette «Nur Otan» partııasy Tóraǵasynyń birinshi orynbasary partııa bastamashy bolǵan árbir joba esep úshin ǵana qolǵa alynbaı, halyqqa naqty paıdasy tıetin mańyzǵa ıe bolý kerektigin aıtty.
Kadr máselesi de nazardan tys qalmady. Sonyń nátıjesinde aldaǵy ýaqytta eń belsendi, el múddesin birinshi kezekke qoıatyn bilikti mamandardan kadrlyq rezerv qurylyp, solardyń qataryndaǵy partııa músheleri memlekettik organdar men máslıhattardaǵy, tipti Parlamenttegi bos laýazymdarǵa usynylatyny aıtyldy. Odan bólek, Máýlen Áshimbaev saılaýaldy baǵdarlamada kórsetilgen ýádeler men mindetterdi oryndaý úshin árbir fılıalǵa bilek sybanyp jumys istep, naqty nátıjelerge qol jetkizýdi tapsyrdy. «Elbasy, partııa Tóraǵasy Nursultan Nazarbaev bizge aýqymdy strategııalyq mindetter júktedi. Biz «bir jeńnen qol, bir jaǵadan bas shyǵaryp» áreket etsek, bul tapsyrmalardy tabysty júzege asyryp, partııanyń qyzmetin jańa sapaǵa kóteremiz dep senemin. Osylaısha partııany zamanaýı, joǵary tehnologııaly, belsendi, perspektıvaly, ınnovasııalyq saıası uıym retinde qaıta qurýǵa múmkindik alamyz. Bul bizdiń qolymyzdan keletinine senemin. Biz jumys barysynda qandaı tásilder men ádisterdi ózgertý kerektigin jáne aldymyzdaǵy mindetterimiz ben baǵyt-baǵdarymyzdy naqty túsindik. Osy baǵyttaǵy jumystarǵa partııamyzdyń barlyq óńirlik fılıaldary belsene atsalysady dep úmittenemin», dedi Máýlen Áshimbaev.
Sondaı-aq jıynda partııa hatshylary Ǵabıdolla Ábdirahymov, Qanybek Jumashev jáne Farhad Qýanǵanov sóz alyp, óz jumys baǵyttary boıynsha baıandama jasady.
Joldybaı BAZAR,
«Egemen Qazaqstan»
