Habarlamada keltirilgen derekke súıensek, QR Premer-Mınıstriniń orynbasary Asqar Jumaǵalıevtiń tapsyrmasymen elektrondyq úkimet portalynda «Anyqtamasyz qyzmet» - «Paper free» servısi iske qosylǵan. Jańa pılottyq jobaǵa sáıkes SMS-habarlama arqyly qyzmet alýshynyń ruqsaty rastalǵan jaǵdaıda úshinshi tulǵalarǵa aqparattyq anyqtamalar usynýǵa múmkindik beredi. «Bıyl 25 qańtardan 5 aqpanǵa deıin halyqqa qyzmet kórsetý ortalyqtary arqyly 312 myń elektrondyq anyqtama berildi. Bul oraıda biz saýalnama júrgizip, anyqtamalardyń 45 paıyzyn azamattar kommýnaldyq qyzmetter men bilim berý mekemelerine tapsyrý maqsatynda alǵanyn anyqtadyq», - deıdi «Azamattarǵa arnalǵan úkimet» memlekettik korporasııasynyń tóraǵasy Abylaıhan Ospanov.
Mysaly, jyl saıyn jańa oqý jyly qarsańynda mektepter oqýshylardan mekenjaı anyqtamasyn suratady, nátıjesinde mıllıondaǵan ata-ana HQKO-ǵa aǵylady. Eger «Paper free» servısi engizilse, oqý oryndary elektrondyq úkimet portalynan qajetti qujatty surata alady, al qyzmet alýshy, ıaǵnı ata-ana SMS-habarlama arqyly elektrondyq anyqtama alýǵa bir rettik ruqsat bergenin rastap, front-ofıske barý mindetinen qutylady. «Bul servısti qoldaný úshin mobıldi azamattar bazasyna tirkelý qajet. «Anyqtamasyz qyzmet» mehanızmine sáıkes, múddeli tulǵa elektrondyq úkimet portalynda avtorızasııadan ótýi tıis.
Sosyn «Úshinshi tulǵalardyń anyqtama alýy servısi» bólimin tańdap, qaı azamat týraly málimet alǵysy keledi, sonyń jeke sáıkestendirý nómirin jazýy tıis. Eger azamat mobıldi azamattar bazasynda tirkelgen bolsa, múddeli tulǵa anyqtama túrin tańdap, óziniń elektrondyq-sıfrlyq qoltańbasymen qol qoıady. Sol sátte portal avtomatty túrde azamatqa SMS-habarlama joldap, úshinshi tulǵaǵa málimet berý/bermeý jóninde sheshim qabyldaýdy suraıdy. Azamat eki saǵattyń ishinde jaýap berýi tıis», delingen habarlamada. «Sıfrlyq Qazaqstan» baǵdarlamasy aıasynda iske qosylǵan «Paper free» nátıjesinde qaǵaz júzindegi anyqtamalar sany 24 mıllıonǵa deıin kemip, halyqqa qyzmet kórsetý ortalyqtaryna kelýshilerdiń qatary da azaıady.
