Foto: Valerıı BÝGAEV
Jýyrda ǵana biz «Egemende» oblys ortalyǵyndaǵy «Ertis yrysy» dep atalatyn ashyq alańda ótetin jármeńke týraly jazǵan edik. Qańtardaǵy aıazdy kúnderi keıinge shegerilgen jármeńke 3 aqpanda ótip, asyǵa kútip júrgen turǵyndar da bir qarq bolyp qalǵan bolatyn.
Biraq, kútpegen jerden «Ertis yrysy» jármeńkesi kóshetin bolyp shyqty. Qala ákimdigi, oblystyq aýyl sharýashylyǵy, kásipkerlik, saýda jáne týrızm basqarmalary jáne «Gold Plaza» JShS birlesip memorandýmǵa qol qoıyp ta úlgeripti. Qala ákimdigi «Endi aýylsharýashylyq jármeńkesi ashyq alańda ótkizilmeıdi. Apta saıyn qaladaǵy Sývorov kóshesi, 11-úı ǵımaratynda jabyq jerde ótedi. Saýda alańyn 5 jyl merzimge óteýsiz paıdalaný úshin kásipkermen kelisimge otyrdyq» dep habarlady. Halyq ań-tań. Jármeńkeniń basqa jerge jáne jabyq ǵımaratqa kóshýine narazy.
Jalpy, jármeńke 2015 jylǵa deıin oblys ortalyǵyndaǵy «Kvazar» saýda úıiniń mańaıynda ótip keldi. Ár senbi saıyn saýda úıi ornalasqan Esenálıev pen Estaı kósheleriniń qıylysy jabylyp, qyzý jármeńkege aınalatyn. Osy jerde 2010 jyldary aýdandar oblys ortalyǵyna kelip, ár apta saıyn jármeńkeni kezektesip ótkizýdi bastaǵan-dy. Kezektesip ótkizý – ár aýdannyń qolda baryn, óndirgen ónimderiniń qanshalyqty baǵaly, sapaly ekenin kórsetse, ekinshiden, aýdandar arasyndaǵy básekelestik artady. Úshinshiden, oblys ortalyǵyna jaqyn jáne alys aýdandar araqashyqtyǵy, aýa raıy jaıy da eskerilgen-di. Keıde eki-úsh aýdan birlesip te ótkizip júrdi. Ákimder de óz aýdandary ótkizetin jármeńkege jaýapkershilikpen qaraı bastady. Alańda án men kúı qalyqtap, sahnada konserttik baǵdarlamamen aýdan jastary óner kórsetedi.
Keıin jármeńke oblys ortalyǵynyń ońtústik shetine qaraı jyljyp, Torgovaıa kóshesi, 4/1 shaǵyn aınalym aýmaǵyna aýysty. Byltyr qysta bul jármeńkege «Ertis yrysy» degen arnaıy ataý da berildi. Oblys ákimi Bolat Baqaýovtyń ózi arnaıy nazar aýdaryp, tapsyrma berip, jańa jármeńke erekshe baqylaýǵa da alynǵan-dy.
Al qazir qala ákimi Nurjan Áshimbetov «jabyq kommýnaldyq bazar ashýdy kópten beri oılap júrgen edik» dep otyr.
– Sebebi turǵyndar jaz mezgilinde aptap ystyqqa, qysta qatty aıazǵa shaǵymdanatyn. Endi óz ǵımaratymyz bar. Kún saıyn saýda jasaı alamyz. Kásipker 5 jylǵa tegin beripti, – deıdi.
Biraq, aıazǵa, ystyqqa shaǵymdanǵan turǵyndar bar degenge sený de qıyn. О́ıtkeni soltústikte ómir súretin oblys halqy, qala jurtshylyǵy qysy-jazy ótip kele jatqan jármeńkelerge ábden úırengen, asyǵa kútedi. Oblystyq, qalalyq ákimdik saıttarynan da aıaz ben ystyqqa aryzdanǵan shaǵym kezdestirmedik. Qaıta, turǵyndar jármeńkeniń ashyq alańda ótýin suraıdy. Keıbireýlerdiń jańa orynǵa kóńilderi tolmaıdy. Báriniń de aıtatyndary: Jármeńkeniń jabyq alańǵa kóshkeni durys emes. Uzyn-sonar kezek. Tar jer. О́nimder jetpeıdi. О́ndirýshi kásiporyndardyń ókilderi orynǵa talasyp, ózara janjaldasyp qalýda. Turǵyndarǵa da qıyn bazar ishi emin-erkin saýda jasaýǵa kedergi keltiredi. Azyq-túlik ónimderine tańdaý az. Sondyqtan jármeńkeniń emin-erkin keń jerde, ashyq alańda ótkenin qalaıdy.
Jabyq bazarda ótkizilgen alǵashqy jármeńke jaqsy nátıje bere qoıǵan joq. Turǵyndar dúrligýin kútpegen qalalyq ákimdik «Endi aýylsharýashylyq jármeńkesi tańǵy saǵat 9.00-den 21.00-ge deıin kún saıyn ótedi. Apta saıyn ótetin jármeńkeni endi kún saıyn ótkizemiz» dep ýáde berýde.
– Suranystyń artýyna baılanysty 15 qańtardan bastap kúndelikti ótkizý týraly sheshim qabyldandy, – deıdi qalalyq kásipkerlik jáne aýyl sharýashylyǵy bóliminiń basshysy Rýslan Tileýlesov.
Biz «Ertis yrysy» dep atalatyn ashyq alańdaǵy jármeńkeni ótkizip júrgen «Forsaj» JShS-niń ókilderimen kezdestik.
– Jármeńke ótkizý jóninde qalalyq ákimdikpen kelisilgen. Biz jármeńkege keletin kóshege deıin jóndep berdik. Bári de ózińiz kórip turǵandaı keń jerde, ashyq alańǵa yńǵaılanyp jasaldy. Jalpy, ashyq alańda ótýi kerek qoı, – deıdi seriktestik dırektory Talǵat Ysqaqov.
Al, qala ákimdiginiń kásipkerlik, aýyl sharýashylyǵy bólimi jáne oblystyq aýyl sharýashylyǵy basqarmasyndaǵylar «Biz eshteńe bilmeımiz, oryndaýshy ǵanamyz» dep jaýap berdi.
– Eger halyq qaıta-qaıta jármeńke kerek dep surap jatsa, múmkin kóship te kelermiz, – desti olar.
Qazir ákimdikter kásipkerlerge, kásipkerler ákimdikterge bir-birine jaýapkershilik artady. Bir-birimen til tabysa almaýda. Múddeler qaıshylyǵy baıqalady. Nátıjesinde ekijaqty kelisimder oryndalmaı qalady. Jármeńkeniń atyn jamylǵan «Jabyq kommýnaldyq bazardyń endigi ıesi «Gold Plaza» JShS-niń múddesi qandaı? Erteńgi kúni qalalyq ákimdik «Gold Plaza» seriktestigimen de kelisimdi úzip, jármeńkeni taǵy da basqa jerge kóshirmesine kim kepil?!
Jármeńke halyq úshin – mereke. Osyny túsineıik aldymen. Ár senbi saıyn ótetin jármeńkeni qala turǵyndary, zeınetkerler asyǵa kútetini eskerilse eken.
Farıda BYQAI,
«Egemen Qazaqstan»
Pavlodar oblysy
