Qazirgi tańda sportshylardyń basym bóligi ADCC uıymynyń erejeleri boıynsha beldesý ótkizýden seskenedi. Sebebi bul birshama qaýipti sport túri sanalady jáne erejeleri de tek kásibı sportshylar úshin qolaıly. Sondyqtan bolar, ázirshe Qazaqstanda ADCC búkilálemdik uıymynyń qoldaýymen, búkilálemdik AIGA áýesqoı grepplıng Federasııasy dúnıege keldi. Onyń ADCC-den bir ereksheligi, upaılar jekpe-jektiń basynan bastap esepteledi. Al ADCC erejeleri boıynsha upaı tek beldesýdiń ekinshi jartysynda ǵana esepke alynady.
Tóreshilerdiń osy ereksheliktiń arqasynda beldesýdiń belsendi bastalatynyn aıtady. «Alǵashqy týrnır elordadaǵy «Alataý» sport kesheninde óte joǵary deńgeıde ótti. Jańa erejelerdiń arqasynda jekpe-jekter óte qyzyqty ári tartysty bolady. Beldesýdiń alǵashqy mınýtynan-aq sylbyr kúres pen basqa ereje buzýshylyq úshin upaılar jeke eseptelip otyrady. Bul erejeler sportshylardyń belsendiligin arttyrdy. Al qatysýshylar óz kezeginde, keremet óner kórsetip, jeńiske degen yntalaryn kúsheıtedi. Bul jekpe-jek túrin ári qaraı damytamyz degen úmittemin», deıdi tóreshi Oljas Dosjanov.
Qazirgi tańda irikteý jarystary elimizdiń barlyq aımaqtary men qalalarynda ótip jatyr. Sonymen qatar áýesqoılar arasynda grepplıngten Qazaqstan chempıonatyn Qaraǵandyda ótkizý josparlanýda. AIGA áýesqoı grepplıng federasııasynyń aıasynda osy sport túrinen birinshi týrnır Astanada ótken.
Aınash ESALI,
«Egemen Qazaqstan»
ALMATY
