Osy maqsatpen Túlkibas aýdanynyń tilderdi damytý jáne mádenıet bólimimen birlese ortalyq qyzmetkerleri «Salbýryn mereke ǵoı saıatshyǵa...» taqyrybynda etnotanymdyq shara uıymdastyrdy. Sharanyń ashylýynda Túlkibas aýdanynyń ákimi Nurbol Turashbekov túlkibastyń tastúlegi, «Alash» Halyqaralyq syılyǵynyń ıesi, jazýshy Marhabat Baıǵut, ortalyq dırektory Jánibek Abdanbekuly men saıat-
shy Muhtar Atahan boldy.
Búrkit baptaý men qumaı tazylardy ańshylyqqa baýlý, ańǵa salý jaıynda oı-pikirler bildirilip, tájirıbe júzinde kórsetildi. Saıatshylyq pen ańshylyqtan qysqa metrajdy beınefılm túsirildi. Ońtústik óńirine belgili qusbegi Jomart Keýenov pen saıatshy Muhtar Atahan óz kásipteriniń qyr-syry týraly tyń maǵlumat berdi.
Salbýrynnyń máni mynada eken. «Ań aýlaý maýsymy kezinde ańshylar toptalyp, ańy mol jerlerge sapar shegedi. Jaqsy at, qyran búrkit, túzý myltyq – bári birdeı saılanady. Ańkós adamdar, bapker qusbegiler, bilgir sańlaq saıatshylar, quralaıdy kózge atqan mergender, elgezek atshy-qosshylar bas qosady. Olardyń ishinde ánshi, kúıshi, jyrshylar da bolady. Sany shektelmeıdi. Bir topta on-on bes búrkit, jıyrma-otyz adam bolýy da múmkin. Al eń az degende búrkitshi, qaǵýshy, atshy-qosshy, bylaısha aıtqanda, úsh-tórt adamnan kem bolmaıdy. El-jurttan aýlaq ıenge shyǵyp, qos tigip, aılap (ádette qarashadan aqpannyń aıaǵyna deıin) jatyp, ań aýlaıdy. Kúndiz jan-jaqqa bytyrap, ań aýlaýǵa ketedi de, keshkilik ot basyna jınalady. Bir jaǵynda túlki, qarsaq, qasqyrdyń terisine shóp, saban tyǵylyp jatsa, ekinshi jaǵynda qońyr ańdar soıylyp, tabaq-tabaq qara qýyrdaq, et tartylyp jatady. Qurt, súzbe qatylǵan qarsaq jon sorpany aıaq-aıaǵymen simirisedi. At-kólik otqa qoıylady, búrkit baptalady. Qaı búrkitti qalaı kútimge alý kerektigi jastarǵa úıretiledi. Salbýrynǵa shyǵýshylar áńgime-dúken quryp, ázil-syqaq aıtysyp, bir-birimen qusbegilik tájirıbelerimen bólisedi.
Salbýrynda olja teń bólinedi. «Ańshydan syralǵy, batyrdan oljany» salty osydan qalǵan.
Myrzabaı OMAROV,
Ádet-ǵuryp jáne salt-dástúr ortalyǵy, ǵylymı-ádistemelik bólim meńgerýshisi
