Aınalasy jarqabaq bolyp bitken sor jaǵasynda bir top kıik jaıylyp júr. Shetkerirek turǵan kári teke aınalaǵa kóz salyp, deldıgen qos tanaýyn jýsannyń jupar ıisine bólengen tań samaly aıalap, qaýiptiń joqtyǵyn sezdirgendeı. Endi ǵana oıanyp, analarynyń ýyz sútine toıǵan laqtar bir-birimen súzisip, oınaqtaı shaýyp júr.
Kenet jarasymdy tabıǵat tirshiligin gúrildegen motor úni men alystan kóterilgen shań buzdy. Spıdometr tili 160-ty kórsetken «Djıp» kóligi tańǵy tynyshtyqty jańǵyrta júıtkip keledi.
Jyndy sýǵa bógip, qyzara bórtken eki jas jigit magnıtofon daýysyn barynsha shyǵaryp, kólikti elire aıdaı tústi. Qaýipti sezgen kári tekeniń belgisimen qashqan bókenderdi qýa jónelgen kólik jyldamdyǵyn údete tústi. Bir kezde kólik terezesinen qos aýyz myltyq kórindi. Aınalasyna ajal oǵyn seýip, atqylap keledi. Myltyqtyń shúrippesin basyp otyrǵan jas jigittiń túri adam shoshyrlyq. Atqan saıyn aqsııa kúlip, toıymsyz kózderi qyzaryp ketken. Bar qaýipti bir ózine burǵysy kelgendeı kári teke kóliktiń aldynan keter emes. Oq ta darymaıdy. Atqan saıyn oǵy dalaǵa ketken jas jigit yzalana tústi. Optıkalyq kózdeýishi bar myltyqty qolyna aldy. Asyqpaı kózdep, tynysyn tejedi. Júreginiń soǵysy jıileı túskendeı sezildi. Atyp kele jatqan kúnniń altyn shapaǵymen shaǵylysqan qos múıizdiń ortasynan kózdedi. Gúrs etken myltyqtyń únimen birge kári teke de aspanǵa shapshı sekirip, omaqasa qulady. Osy kezde rýlde otyrǵan seriginiń jan ushyra aıqaılaǵany qulaǵyna kelip, dúnıe astan-kesten bolyp júre berdi. Bir qarańǵylyqqa súńgip ketkendeı...
Qansha jatqany belgisiz, uıqydan oıanǵandaı kúı keshken Asylhan kózin áreń ashty. Ábden qara túnekke batqan qos janary jaryq sáýlege úırener emes. Jaman tús kórgendeı, denesi sýyq terge malshyna terlepti. Tósekte jatqanyn endi sezdi. Jaryqqa endi kózi úırengendeı aınalasyna kóz jiberdi. Aýrýhananyń jan saqtaý bóliminde jalǵyz ózi jatyr. Shól qysqan erinderi kezerip, tili tańdaıyna jabysyp qalǵan. Tek qos janarynan parlaı aqqan jastyń ashy dámi tiline bilindi. Jylap jatyr eken. Ornynan turǵysy kelip talpynyp edi, aıaq-qoly ózine baǵynbaıdy. Baǵynbaq túgili qozǵalmaıtyn sııaqty. Taspen bastyryp tastaǵandaı.
Asylhan aýrýhanada uzaq jatty. Dárigerler kólik apaty saldarynan bel omyrtqasyna zaqym kelgen degen dıagnoz qoıdy. Alla sátin salyp, ajal tyrnaǵynan aman qalǵan edi. Tek bir ókinishtisi, jıyrma beske endi ǵana aıaq basqan jas jigit qol arbaǵa tańylmaq. Keýdesinen tómen jan joq. Qasynda bolǵan dosy Álibek ómirden ozypty. Jaqynda qyryq kúndik asy berilmek. Bul jaǵdaıdy aýrýhanaǵa kelgen anasynan estidi.
Jan dúnıesi órtenip ketkendeı, jylap jatyr. Bul – ókinishtiń kóz jasy. – Nege bulaı boldy? – degen suraq kókeıinen keter emes.
Úıdegi tóseginde jatqan Asylhannyń qazirgi jaǵdaıy esh ózgerissiz. Bir jyldan assa da aýrýyna shıpa tabylmady. Ata-anasy shyryldap júrip Qytaıǵa deıin alyp bardy. Biraq esh nátıje joq. Aldyna qoıǵan asqa da tábeti shappaı, asty-ústine túsip júrgen ata-anasyna da, baýyrlaryna da tis jaryp sóılegen emes. О́ziniń tuńǵıyq oıyna bata beredi...
Kózin jumsa boldy kári kıiktiń beınesi kóz aldynan ketpeıdi. Kózine elestegen saıyn bar dúnıe astan-kesten bolyp, qara túnek basqandaı.
– Kıiktiń kıesi degen osy shyǵar, osy shyǵar?! – dep kúbirleı berdi...
Qaırat JAQYP
Batys Qazaqstan oblysy,
Qaztalov aýdany
