Memleket basshysy ýnıversıtet tarapynan atqarylyp jatqan jumystardyń nátıjelerin atap ótip, jahandyq ekonomıkalyq jáne tehnologııalyq ózgerister jaǵdaıyna beıimdelgen jas mamandardy oqytý isindegi joǵary oqý oryndarynyń róline basa nazar aýdardy.
– Siz kóp jyldan beri elimizdegi eń iri jáne basty ýnıversıtetterdiń birin basqaryp kelesiz. Munda shetelden kelip oqıtyn stýdentter bar. Ýnıversıtet elimizdiń joǵary oqý oryndary arasynda joǵary reıtıngke ıe bolyp otyr, – dedi Qazaqstan Prezıdenti.
Ǵalymqaıyr Mutanov Nursultan Nazarbaevqa ýnıversıtetti transformasııalaý jáne oqý úderisin zamanaýı talaptarǵa beıimdeý nátıjeleri jóninde baıandady.
– Bizdiń negizgi maqsatymyz – oqý ornyn álemdik deńgeıdegi zertteý ýnıversıtetine aınaldyrý. Soǵan oraı jetekshi mamandar daıarlanyp qana qoımaı, ǵylym men ınnovasııany damytý máselesi de qamtylatyn bolady. Jalpy, ýnıversıtetter ınnovasııalyq ekonomıkanyń draıveri bolýǵa tıis, – dedi ál-Farabı atyndaǵy Qazaq ulttyq ýnıversıtetiniń rektory.
Ǵ.Mutanov Memleket basshysyna IT jáne jańa tehnologııalar salasyndaǵy jobalardyń iske asyrylý barysy jóninde málimdep, oqý ornynyń bazasynda qurylǵan IT-tehnoparki aıasynda ýnıversıtetaralyq ózara yqpaldastyqtyń ornaǵanyn aıtty. Ál-Farabı atyndaǵy Qazaq ulttyq ýnıversıteti rektorynyń málimetine sáıkes, búginde osy oqý ornyndaǵy stýdentterdiń 60 paıyzdan astamy jaratylystaný ǵylymdary boıynsha bilim alýda.
Kezdesý sońynda Qazaqstan Prezıdenti birqatar naqty tapsyrma berdi.
