Búgin Astanada fýtboldan ulttyq quramanyń bas jattyqtyrýshysyn tanystyrý rásimi ótti. Baspasóz máslıhatyna qatysqan Qazaqstan fýtbol federasııasynyń bas hatshysy Azamat Aıtqojın jýrnalısterge buǵan deıin elordanyń «Astana» komandasyn jattyqtyryp, joǵary nátıje kórsete bilgen bolgar mamany Stanımır Stoılov ulttyq quramanyń bas jattyqtyrýshy qyzmetine taǵaıyndalǵanyn málimdedi.
Osyǵan deıin QFF bas hatshysy Azamat Aıthojın qurama tizginin eshqandaı reseılik bapkerler ustamaıtynyn, ulttyq quramaǵa Talǵat Baısýfınov pen «Astana» klýbynyń bas jattyqtyrýshysy Stanımır Stoılov kelýi múmkin ekendigin aıtqan bolatyn. Sóıtip, tańdaý sońǵysyna túsken eken.
«Biz eshqandaı reseılik bapkerlermen kelissóz júrgizgen joqpyz. Bizde fýtboldan Qazaqstan ulttyq quramasynyń bas jattyqtyrýshysy bolýǵa tórt úmitkerdiń tizimi boldy. Atap aıtqanda, qazaqstandyq Talǵat Baısýfınov jáne qazaqstandyq komandamen jumys istegen bolgarııalyq Stanımır Stoılovty erekshe qarastyrǵanymyzdy jasyrmaımyn. Sondaı-aq tizimde sheteldik jattyqtyrýshylar da boldy. Biraq biz Stanımır Stoılovty ulttyq quramaǵa laıyqty jattyqtyrýshy dep taptyq», dedi bas hatshy.
Baspasóz jıynynda «Astana» fýtbol klýbynyń emes, ulttyq quramanyń bas jattyqtyrýshy retinde sóz alǵan Stanımır Stoılov endigi kezekte Qazaqstan fýtbolynyń damýyna bar kúsh-jigerin salatynyn aıtty.
«Keshe Qazaqstan fýtbol federasııasynyń prezıdentimen jolyǵyp, ulttyq qurama tóńiregindegi birqatar máselelerdi talqylap aldyq. Men buǵan deıin Qazaqstannyń komandasyn jattyqtyryp, bıik beleske kótergen bolsam, endigi kezekte bar kúshimdi ulttyq quramaǵa salamyn. Qazaqstandyq jankúıerler buǵan deıin teń oıynǵa qýanǵan bolsa, endi tek jeńiske qýanatyn bolady dep úmittenemin», deıdi S.Stoılov.
Aıta keteıik, buǵan deıin ulttyq quramany reseılik maman Aleksandr Borodıýk jattyqtyrǵan bolatyn. Ol Qazaqstan quramasynyń bas jattyqtyrýshysy bolyp ótken jyldyń 27 aqpanynda taǵaıyndalyp, úsh jyldyq kelisimshartqa otyrǵan bolatyn. Bir jyldyń ishinde Borodıýk ulttyq quramamen jeti oıyn ótkizip, ber ret teń oınap, jeti ret qarsylasqa ese jibergen. Osyndaı sátsiz nátıjesi úshin ulttyq qurama onyń qyzmetinen bas tartqan edi.
Stanımır Stoılovtyń Qazaqstan ulttyq quramasymen alǵashqy oıynyn 23 naýryzda Býdapeshte Vengrııa quramasymen joldastyq kezdesýde ótkizedi.
