Qazaq estrada juldyzdarynyń qatysýymen ótken «Myń alǵys» atty saltanatty konsertti ashqan Memlekettik hatshy Gúlshara Ábdiqalyqova Prezıdent Nursultan Nazarbaevtyń Alǵys aıtý kúnine baılanysty halyqqa arnalǵan quttyqtaý hatyn oqyp berdi. Onda qıyn-qystaý jyldardaǵy adamgershilik pen ımandylyq ústemdiginiń jadymyzda bolýy Qazaqstan halqyn biriktiredi dep atap ótilgen. Sonymen qatar Prezıdent meıirimdilik, ózara kómek pen bir-birine degen qurmet barlyq qazaqstandyqtar qasterleıtin ári maqtan tutatyn dostyq pen yntymaqtyń biregeı atmosferasyn qazaqtyń kıeli topyraǵynda qalyptastyrýǵa múmkindik bergenin aıtyp, Alǵys aıtý kúniniń basty mánine toqtalyp ótken.
Prezıdenttiń quttyqtaý sózin oqyǵannan keıin Gúlshara Ábdiqalyqova Qazaqstan halqy Assambleıasynyń «Qaıyrymdy kórshilerge rahmet!» atty respýblıkalyq aksııasynyń bastalǵanyn, onyń túrli etnos pen dil ókilderin, barlyq qazaqstandyqtardy jaqyndastyra túsýge baǵyttalǵanyn aıtty.
«2016 jyly Elbasynyń jarlyǵymen Alǵys aıtý kúni belgilendi. Bul mereke osymen úshinshi ret atalyp otyr. Bul kúni QHA-nyń usynysymen jyl saıyn bilgili bir aksııa bastalady. Búgin «Qaıyrymdy kórshige rahmet!» degen aksııa bastalmaq. Qazaq «Týysy jaqyn jaqyn emes, kórshisi jaqyn jaqyn» deıdi. Sondyqtan osy aksııa barysynda árbir kóshede, qalada, árbir aýylda qoldaýdy qajet etetin azamattarǵa Assambleıa bolyp, halyq bolyp, kórshi bolyp kómek kórsetemiz», dedi ol.
Sonymen qatar Memlekettik hatshy kórshi otyrǵan aýdandar men qalalardyń, basqa da eldi mekender turǵyndarynyń kezdesýin ótkizýge shaqyrdy. Onyń aıtýynsha, bul otandastarymyzdyń bir-birimen jaqynyraq tanysýyna kómektesedi, sonymen qatar ókpe-renishti keshirip, ıgi tilek aıtý úshin de kerek.
Sondaı-aq saltanatty jıyn barysynda Elbasy Nursultan Nazarbaevtyń Qazaqstan halqy Assambleıasynyń HHV sessııasynda bergen tapsyrmasyn oryndaý jáne «Rýhanı jańǵyrý» baǵdarlamasyn júzege asyrý aıasynda QHA-nyń jańa mýltımedııalyq portalynyń tanystyrylymy ótti. Tanystyrý rásimine qatysqan Aqparat jáne kommýnıkasııalar mınıstri Dáýren Abaev kópshilikti Alǵys aıtý kúnimen quttyqtaı otyryp, mereke elimizde tatýlyq pen birliktiń úlken nyshany dep esepteýge bolatynyn aıtty. Sonymen qatar ol Prezıdenttiń tapsyrmasy boıynsha QHA-nyń portalyn Aqparat jáne kommýnıkasııalar mınıstrligi men «Qazkontent» AQ jasaǵanyn atap ótti.
Portaldy tanystyrǵan «Qazkontent» AQ basqarma tóraǵasy Evgenıı Kochetov Memleket basshysy atalǵan portaldyń mýltımedııalyq múmkindikterine basa mán berýdi tapsyrǵanyn, www.assembly.kz ınternet-resýrsy zamanaýı platformaǵa qosylyp, memlekettiń resmı saıttarymen baılanystyrylǵanyn aıtty. Sonymen qatar saıttyń negizgi taraptary jańalanyp, zamanaýı standarttarǵa sáıkestendirilgenin de atap ótti.
«Biz Prezıdenttiń tapsyrmasy boıynsha jumys istedik. Atalǵan portalda onlaın-translıasııalar men konferensııalar ótkizýge bolady. Sonymen qatar QHA músheleri elimizdiń kez kelgen bóliginde otyryp onlaın rejimde bir-birimen baılanys ornata alady», dedi E.Kochetov. Onyń aıtýynsha, saıt arqyly elimizdiń kórikti jerlerine, Beıbitshilik jáne kelisim saraıyna, Dostyq úılerine 3D týr uıymdastyrýǵa bolady. Sondaı-aq saıtta kóptegen medıa-joba, ınteraktıvti ınfografıka men basqa da aqparattar jınaqtalatyn bolady.
Saltanatty jıyn barysynda Shoqan Ýálıhanov atyndaǵy tarıh jáne etnologııa ınstıtýtynyń dırektory Zııabek Qabyldınov «Qazaqstan halqy» atty arnaıy mýltımedııalyq kartany tanystyrdy.
«Bul karta elimizdegi ultaralyq qatynastardy nyǵaıtyp, birlikti kúsheıtýge baǵyttalǵan. «Qazaqstan halqy» atty tarıhı karta Elbasy Nursultan Nazarbaevtyń tikeleı tapsyrmasymen jasaldy. Karta úsh tilde daıyndaldy jáne úsh bólimnen turady. Birinshisi – ınteraktıvti tarıhı karta. Ekinshi bólim – qazaqstan halqy, úshinshisi – Táýelsizdik dáýiri. Álem bizdiń Prezıdentimiz qurǵan qazaqstandyq ultaralyq modelin moıyndady. Bolashaqta kartany jańa málimettermen tolyqtyrylyp otyrady», dedi ol.
Sonymen qatar Zııabek Qabyldınov atalǵan ınteraktıvti ǵylymı kartany jasaýǵa Bilim jáne ǵylym mınıstrligi, ǵylymı zertteý uıymdary, tarıh, geografııa, IT tehnologııa salasyndaǵy jetekshi mamandary óz úlesterin qosqanyn atap ótti.
Aıta ketý kerek, Alǵys aıtý kúni Qazaqstan Respýblıkasy Prezıdentiniń 2016 jylǵy 14 qańtardaǵy №173 Jarlyǵymen bekitilgen bolatyn. Alǵys aıtý kúnine oraı respýblıka boıynsha 3,4 myń eldi mekende 2,5 mıllıonnan astam adamnyń qatysýymen 10 myńǵa jýyq is-shara ótedi dep josparlanǵan bolatyn. Onyń ishinde etnomádenı birlestikter men Dostyq úıleri bazasynda uıymdastyrý kózdelgen merekelik is-sharalar men qaıyrymdylyq aksııalary da bar.
Gúlnur QÝANYShBEKQYZY,
«Egemen Qazaqstan»
Sýretterdi túsirgen Erlan OMAR,
"Egemen Qazaqstan"
