Vıse-premer Belarýs Respýblıkasy Premer-mınıstriniń birinshi orynbasary Vasılıı Matıýshevskıımen jáne baılanys jáne aqparattandyrý mınıstri Sergeı Popkovpen kezdesti. Taraptar eki eldiń aqparattyq tehnologııalar salasyndaǵy yntymaqtastyǵy múmkindikterin talqylady.
Odan ári Qazaqstan ókilderi Belarýstiń Joǵary tehnologııalar parkine bardy. Park rezıdentteri túrli salalarǵa arnalǵan baǵdarlamalyq qamsyzdandyrýlar, sıfrly sheshimder ázirleýmen aınalysady. «Joǵary tehnologııalar parkiniń ákimshiligi» MB dırektory Vsevolod Iаnchevskııdiń aıtýynsha, ishki naryqtyń bolmaýyna baılanysty startaptar áýelden sheteldik kompanııalarmen básekelestikke baǵdarlanǵan, sondyqtan da olardyń ónimderi sapasymen jáne biregeıligimen erekshelenedi. Búginde birneshe belarýstik startaptar dúnıejúzilik tanymaldyqqa ıe bolǵan.
Joǵary tehnologııalar parkiniń tájirıbesi qazaqstandyq Astana IT-Hub úshin paıdaly bolýy múmkin. Kezdesý sońynda taraptar yntymaqtastyqty odan ári jalǵastyrý týraly kelisimge keldi, ol Astana IT-Hub alańynda jalǵasýy múmkin.
Budan ózge, qazaqstandyq delegasııa qala ınfraqurylymyna, ónerkásip, aýyl sharýashylyǵy, qaýipsizdik jáne t.b. salalarǵa arnalǵan sıfrly sheshimderdi usynǵan belarýstik kompanııalarmen birqatar kezdesýler ótkizdi. Kompanııalar qazaqstandyq naryq áleýetiniń zor ekenine kóz jetkizip otyr jáne «Sıfrly Qazaqstan» baǵdarlamasynyń jobalaryna qatysýǵa ázir.
