Al endi «ulttyq quramany Stanımır Stoılov qandaı deńgeıge kóterýi múmkin?» degen oı kelýi zańdylyq. Biz osy tusta sport salasynyń basy-qasynda júrgen birneshe jýrnalıstiń pikirin berip otyrmyz.
Nesip Júnisbaı: «Stanımır Stoılovtyń «Astanada» júrip jetken jetistikteri maqtaýǵa turarlyq. Biraq otandyq fýtboldyń deńgeıin Stanımır Stoılov ta kótere alady degenge kúmánim bar. Men bilsem bolgar mamany eshqandaı jetistikke jete almaıdy.
Qazirgi problemamyz Qazaqstan ulttyq quramasynyń ÝEFA-ǵa quramyna qolsyǵany bolyp tur. Al qazaq fýtboly men Eýropa fýtbolynyń deńgeıi jer men kókteı. Sondyqtan el fýtbolyn órkendetip almaı, quramany bapker alyp shyǵady dep oılamaımyn. Ulttyq quramamyzdy tipti tájirıbesi mol Joze Moýrıno, Arsen Venger jattyqtyrsa da bir beleske kóterýi ekitalaı».
Dúráli Dúısebaı: «Jeke óz basym úshin bul durys tańdaý boldy. Osy taǵaıyndaýdy uzaq kúttim. Kelisý prosesi birazǵa sozyldy, biraq durys sheshildi.
Qazir Qazaqstanda Stoılovtan asqan bapkerdi kórip turǵan joqpyn. Eń bastysy, ol iri taktık. «Astanada» «Qaırattaǵydaı» asa qundy fýtbolshylar joq. Sonyń ózinde bolgarııalyq bapker sýper komanda jasaqtap, búkil Eýropa sanasatyn ujym jasap shyqty. «Qaırat» she? «Qaıratqa» týra osy Stanımırdeı bapker kelse, «Astanadan» da myqty ujym qalyptastyrýǵa bolar edi.
Jańa bapker el komandasyn kóterýge ýáde berip jatyr. Ol ýádege sarań adam, sóz berdi me qolynan kelgenniń bárin isteıdi. Ol endi eń aldymen, qabiletti komanda jasaqtaýǵa kirisedi. Birden jańa komanda jasaqtaý qıyn, árıne. Ony kóp uzata qoımas. Al bizde bolashaǵy bar, sheber oıynshylar az emes. Biraq ony kóre bilý kerek, ol úshin tek kóregen kóz ǵana emes, keremet túısik ári basqa bapkerlerdiń kómegi kerek. Stoılovta túısik bar, endi premer-lıga bapkerleri eptep «sybyrlaı» qoısa, eýrokomandalardyń tegeýrinine shydas beretin jańa komanda jasaqtaýǵa bolady. Jańa degende, 15-20 paıyz jańarsa da – jańa komanda.
Ekinshiden, jańa bapkerdiń súıikti isi – tártip. Bizge jetise bermeıtini de sol. Biraz «juldyz» bar bizde. Sondaılar sabasyna túsip, eli úshin jan sala oınasa maqsatymyz oryndaldy dep esepteýge bolar edi.
Qalaı desek te, áliptiń artyn baqqan jón. Quramanyń jańa bapkerin túrtpekteı bermeı, jumys isteýine múmkindik jasaý kerek».
Amangeldi Seıithan: «Elimizde qazirgi ýaqytta eń bilikti bapker Stoılov dep oılaımyn. Biraq bolgar mamany úshin naǵyz syn sát endi bastaldy. «Astana» ol bir basqa, ol jaqta negizgi kúsh legıonerlerge tústi. Endi qanshalyqty myqty bapker ekenin otandyq fýtbolshylarmen kórsetýi tıis. О́ziniń biliktiligin dáláldeıtin sát keldi.
Men myna nárseni aıta ketkim keledi, áıteýir Qazaqstanǵa bir qatysy bar degen nıetpen shette júrgen fýtbolshylardy ulttyq quramaǵa shaqyrmasa eken deımin. Osy tusta Talǵat Baısýfınovty mysalǵa keltire ketkim keledi. О́z tusynda ol tek qazaqstandyqtardy alańǵa shyǵaryp, jaqsy nátıje kórsetken bolatyn. Mine, osy tájirıbeni paıdalansa nur ústine nur bolar edi».
Asqar Hamıden («Astana» FK baspasóz hatshysy): «Stanımır Stoılovtyń «Astanadaǵy» jetistigin bárimiz bilemiz. Elordanyń komandasyn buryn-sońdy bolmaǵan jetistikke jetkizip ketti. Tarıhı sátterdiń sebepshisi boldy. 51 jastaǵy maman press-konferensııalarda elimizdegi fýtboldyń jaǵdaıyn, balalar fýtbolynyń, stadıondardyń, jasandy alańdardyń, ıaǵnı ınfraqurylym problemasyn jıi qozǵaıtyn. Endi ulttyq quramada osy máselelerdi qolǵa alýy qajet. Eger bári josparly túrde júzege assa aldaǵy ulttar kýbogynda jaqsy nátıje kórsetedi dep oılaımyn.
Stanımır Stoılovtyń bir artyqshylyǵyn aıta keteıin, ol «Astanany» jattyqtyryp júrse de, ulttyq quramada óner kórsetetin fýtbolshylar jaıly jaqsy biledi. Tipti birinshi, ekinshi lıganyń matchtaryn da nazarynan tys qaldyrmaıtyn. Jastardyń áleýetin, shama-sharqyn, deńgeıin jaqsy biletinine senimdimin.
Stoılovqa azdap ýaqyt berý qajet dep oılaımyn. Birden Eýropa, álem chempıonattarynyń toptyq kezeńine shyǵarady dep qysymǵa almaǵanymyz jón. Qaıta jankúıer, BAQ ókilderi tarapy «Astanadaǵy» jetistikterin negizge ala otyryp, senim artýy qajet».
Daıyndaǵan Aıan ÁBDÝÁLI, «Egemen Qazaqstan»
