Ásirese Aızar Aıdos «Qaıter edik ómirge kelmegende» ánin aıtqandaǵy muńdy daýysy zaldaǵy jurtshylyqtyń kózine jas úıirdi. Qaıyrymdylyq konsert bastalmas buryn S.Amanjolov atyndaǵy ýnıversıtettiń «Shabyt» teatrynyń stýdentteri mylqaý qyzdyń taǵdyryn baıandaıtyn shaǵyn qoıylymdy kórermen nazaryna usyndy. Mádenı shara aıaqtalǵannan keıin «Úlbi» múmkindigi shekteýli balalar ortalyǵynyń tárbıelenýshisi, serebraldy sal aýrýymen aýyratyn Rollan Symbatov sahnaǵa shaqyrylyp, oǵan osy ýnıversıtettiń túlegi, jeke kásipker Mıras Saınoldın 200 myń teńgeni tabys etti.
«Nurly júrek» qaıyrymdylyq klýbynyń jetekshisi, oqý ornynyń sáýlet fakýltetiniń 3-kýrs stýdenti Nurgúl Bazylqyzynyń aıtýynsha, Rollan emdelý úshin jaqynda Qytaı eline barmaq. Onda baryp, tek tirkelý úshin ǵana 2 jarym mıllıon teńge qarjy kerek eken. «Byltyr «Nurly júrektiń» músheleri Rollannyń óz elimizde emdelýine 500 myń teńge qarjy jınap bergen bolatyn. Al 2 jarym mıllıon teńge sáýir aıyna deıin jınalýǵa tıis. Odan keıin qansha ret shaqyrady, qansha qarjy jumsalady. Ol jaǵy ázirge belgisiz», - deıdi Nurgúl.
«Nurly júrek» qaıyrymdylyq klýby osydan týra bir jyl buryn jumysyn bastapty. Klýb músheleriniń barlyǵy da - D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń stýdentteri. Elýge jýyq múshesi bar klýb múmkindigi shekteýli, ata-ana qamqorlyǵynsyz qalǵan balalar men áleýmettik turǵydan az qamtylǵan otbasylarǵa kómek kórsetý maqsatynda qurylypty. «О́zderińiz kórgendeı, búgin sahnaǵa múmkindigi shekteýli balalardy shyǵaryp, án salǵyzdyq. Olar ózderin eshkimnen kem sezinbese, qoǵamnan oqshaý qalmasa deımiz. Klýbymyzdy aınalamyzdaǵy kómekke muqtaj, taǵdyr taýqymetin tartyp júrgen jandarǵa az da bolsa septigimizdi tıgizsek degen nıetpen qurǵan edik.
Biz qaıyrymdylyq aksııalaryn, qaıyrymdylyq konsertterin, qaıyrymdylyq jármeńkelerin jıi uıymdastyramyz. Jármeńkede óz qolymyzben pisirgen tamaqtarymyzdy satyp, túsken qarjyny naýqas balalardyń qajetine jumsaımyz. Jaqynda múmkindigi shekteýli balalar arasynda sporttyq saıys ótkizdik. Stýdentter bárine úlgerýge tyrysady. Sabaqty da oqıdy, jumys ta isteıdi, qaıyrymdylyq ta jasaıdy. Bir áttegen-aıy, bir jyl ishinde qaıyrymdylyq sharalaryna demeýshilerdi tarta almadyq. Bul úshin bizdiń klýbqa zańdy túrde tirkelý kerek eken. Qazir osy máselemen shuǵyldanyp jatyrmyz», - deıdi qaıyrymdylyq klýbynyń jetekshisi. Osy sharaǵa Aızar Aıdos esimdi múmkindigi shekteýli balanyń ájesi Marjan Shábıeva arnaıy kelipti. «Meniń nemerem júre almaıdy. Arbaǵa tańylǵan. Myna stýdentterge myń alǵys. Kelip, jaǵdaıymyzdy bilip, syılyqtaryn ákep turady», - dep rızashylyǵyn jetkizdi.
Kesh sońynda «Úmit» balalar úıi, «Úlbi» múmkindigi shekteýli balalar ortalyǵy men «Aqnıet» mektep-ınternatynyń 130 tárbıelenýshisine syılyqtar tabys etildi.
Azamat QASYM,
«Egemen Qazaqstan»
О́SKEMEN
