Búgin Astana ákimdiginde monolıtshiler Rýslan Berikov, Aqylbek Jaqaıymov, Ádilbek Daǵystan jáne tereze montajdaýshy Jasulan Baıseıitov, ınjener Rýslan Jalbaqov ákim atynan alǵys hattarmen, «Belsendi azamat» estelik músinshelerimen jáne aqshalaı syıaqymen marapattaldy.
Marapattaýdan keıin batyrlardyń biri Jasulan Baıseıitov barlyq áriptesteriniń kómekke umtylǵysy kelgenin jetkizdi. «Adamdardy qutqaryp qalǵanymyz úshin qýanyshtymyn, esh dúrbeleń bolǵan joq. Men ózim eńbekti qorǵaý jáne qaýipsizdik tehnıkasy boıynsha ınjenermin. Eń aldymen qobaljymaý qajettigin bilemin, ekinshi qaǵıda - durys uıymdastyrý. Yntymaqtyǵymyzdyń arqasynda bári oıdaǵydaı ótti», - deıdi Jasulan Baıseıitov.
О́z kezeginde Áset Isekeshev jas jigitterdiń ómirlerin qaterge tigip, naǵyz erlik tanytqanyn atap ótti jáne úlken alǵys bildirdi. «Sizder belsendi azamattar retinde, erlik is kórsettińizder. Bul biz úshin, ásirese sizder qutqaryp qalǵan adamdardyń jaqyndary men týystary úshin óte qundy jáne adamı qasıetterdiń eń joǵary baǵasyna laıyq», - dedi ákim.
Astana TJ departamenti basshysy Barat Duzaqbaevtyń aıtýynsha, barlyq qurylysshylar «Tótenshe jaǵdaıdaǵy erligi úshin» vedomstvalyq tósbelgisine usynyldy.
Eske sala ketsek, keshe «Nova City» kópqabatty turǵyn úı kesheniniń 7 qabatynan órt shyqty. Kórshiles ǵımaratty turǵyzyp jatqan qurylysshylar órt shyqqan páterge órmelegen jáne balalar men áıeldi tereze arqyly tómengi qabatqa túsirgen.
